霆鋒窩心湯 祖兒得個恨字
「型男廚神」謝霆鋒在前晚浪漫的平安夜，率領英皇一眾同門歌手到上海開騷歡度佳節。化身大廚的霆鋒更將美食車搬上舞台，即席烹調窩心靚湯，還親手餵粉絲食麵，令擘大口企隔籬的容祖兒、蔡卓妍（阿Sa）恨到流口水！
由謝霆鋒領軍的「《決戰食神》英皇超級巨星演唱會」前晚在上海大舞台舉行，參與演出的歌手包括容祖兒、李克勤、林峯、Twins、關智斌及泳兒，眾星輪流上台獻唱金曲。而林峯以光頭look上陣都依然chok到爆，跟舞蹈員勁歌熱舞演繹《Heart Attack》，贏得觀眾熱烈掌聲。
《克不容緩》明年開騷
至於天后容祖兒除了solo《揮着翅膀的女孩》，又與李克勤一口氣合唱四首經典歌曲。祖兒還分享自己「可怕」入廚經歷，並調侃克勤比自己更加不精通廚藝，兩人又透露《克不容緩》組合演唱會即將於明年開騷。
霆鋒以電影《決戰食神》中的「食神」造型亮相，親自踏着美食車上台為fans炮製美食，祖兒打趣道：「我從來沒有看過謝霆鋒煮麵！」霆鋒又特別烹煮「窩心粉絲湯」，寓意感謝粉絲，粉絲湯有鮑魚及豬蹄等食材，兩位幸運粉絲，除能與霆鋒抱抱，更得霆鋒親自餵食！企正粉絲隔籬的祖兒、阿Sa，雖然口擘擘流口水，但都得個恨字。霆鋒擔心粉絲咬到骨頭，更細心地將豬蹄去骨，並叮囑fans小心燙，貼心得令粉絲幾乎感動流淚。
自掏腰包補償
霆鋒雖然落力表演大廚功架，不過有粉絲卻不滿霆鋒在演唱會台上20分鐘，只掛住煮食唱得一首歌似被騙，失望得想哭。英皇娛樂執行總裁霍汶希（Mani）表示：「霆鋒知道呢件事後，佢願意拎自己荷包嘅錢，去買北京站嘅票，送畀唔開心嘅粉絲作補償，粉絲憑上海站票尾就可以啦，因為霆鋒覺得喺節日最緊要開心。」Mani表示霆鋒覺得自己開始煮菜後，人生才得以改變，所以他希望在這些特別日子去用這個方式和粉絲分享，但可能其歌手形象令人太深刻，粉絲覺得他唱得不夠，所以他願意作出補償。
文：音樂組