趙哲妤開工作動 馬國早產
前中國小姐趙哲妤早前驚爆未婚懷孕，男友失蹤兼婚期無望，原定預產期明年1月的她，為了多賺奶粉錢，佗着9個月身孕仍冒險飛到馬來西亞工作，期間突然作動，BB趕在聖誕前出世。
現年29歲的趙哲妤（Uny）早前於活動上自爆懷孕佗B女，但對於經手人身份則三緘其口，自認現時單身的她表示會獨力照顧BB，為BB未來生活及教育，將會幫BB儲臍帶血，但樣樣都要錢，Uny大肚後工作非常拚搏。為了賺奶粉錢，預產期為明年1月9日的她早前仍腹大便便到馬來西亞工作、探朋友兼做水中瑜伽，點知變了順道誕B，榮升做媽咪。Uny前日在社交平台上載旅行照並寫上：「這個冬天不太冷，祝大家平安夜快樂」未有提及早產一事。昨日聯絡身在馬來西亞的Uny，對榮升人母，她不作回應，只表示有喜訊會向大家公布。
只擁居留權 未必能入籍
其形象指導好友許嘉浩（Karl）前晚出席活動時未知Uny誕B，他說：「佢去咗馬來西亞做嘢，我哋成班朋友都鬧佢，好危險，但佢話如果唔去得嘅話醫生都會唔畀。」又透露Uny在港已請了陪月及訂了醫院作準備，昨日再聯絡他，他轉口風說：「佢喺馬來西亞生，因為唔適合坐飛機返香港喇！」
Uny今次突然在馬來西亞誕B，本報記者致電陸偉洪律師查詢有關BB國籍的問題，陸律師表示BB未必擁有當地國籍：「喺當地出世嘅BB只可以話有居留權，不一定可以入籍當地。但如果BB嘅爸爸係當地人，BB就可以隨爸爸擁有當地國籍。」
文：名人組