田蕊妮送解酒丸 笑阿澤「斷片」
藝人田蕊妮與黎諾懿昨午出席聖誕節活動，正於內地拍劇的阿田特別抽空返港，談到被老公杜汶澤「投訴」只顧與同事交換聖誕禮物，她笑說：「會補送禮物畀佢，送解酒丸囉﹗」擺明笑老公被拍得飲到斷片，阿田即澄清：「其實係佢首次執導電影嘅煞科飯局，佢同台前幕後感情好好，一齊去玩係應該嘅，佢哋尋晚再嚟咗我屋企玩。（阿澤再次斷片？）係呀！（話你要養家？）坦白講我唔使佢養，我好細個出嚟做嘢，唔習慣被包養！佢咁大隻我都養佢唔起，大家經濟獨立。」
至於黎諾懿透露太太懷孕近六個月：「佢又冇作嘔，身體狀況好OK。原本我要返內地拍新劇《天命》，但出埠日子去到3月，太太預產期就係4月中，衡量過後我辭演，公司都好體諒。（去探陳敏之取經？）呢兩日會去，佢用唔晒嘅BB物資記得留畀我！我尋日同親戚啲小朋友去玩，湊仔都上手，最近又學識咗單手換尿布。」
