Stephy聖誕拒見小方打波攝時間
早前宣布與方力申結束10年情的鄧麗欣，巧合地接拍一部失戀戲，前晚她在首映上撒嬌投訴導演在傷口上灑鹽，更一度考慮辭演！聖誕將至，她表示不會約小方見面，因日子太敏感，難怪小方要與波友打籃球迎佳節！
鄧麗欣（Stephy）前晚以一身Tube Dress公主打扮出席新片首映，吸引莊思敏、顏子菲、林頴彤及溫碧霞等盛裝捧場。談到拍攝期間正值與舊愛方力申宣布10年情玩完，Stephy坦言：「覺得導演喺我傷口上灑鹽囉！唔想畀人話我炒作，所以曾經卻步，但聽完個古仔知道唔係淨係講愛情，所以就拍啦！我有諗過要求改戲名，不過又冇Idea。」
談到戲中被金燕玲狂摑，Stephy笑說：「戲內佢係我媽媽，但我哋母女情薄又有誤會，佢咪出手打我囉！拍咗6、7個Take，其中一次我真係見暈，原來佢係武林高手！（心傷加身傷？）所以當時嘅喊戲，我好自然就喊得出喇！」問到有否考慮請小方捧場，她竟說：「我哋講笑有咁講過，不過同場仲有其他演員，為免尷尬都係唔好喇！希望遲啲佢入場支持吓啦！」
喜宴相遇分開坐
講起小方，Stephy的態度似乎已進一步軟化，又自爆早前在同事婚禮上撞到對方：「唔係一齊坐，朋友夾喺我哋中間表現好尷尬。（呼籲大家由得你哋？）都係呀！（聖誕約佢？）太敏感，話晒特別日子，平日會好少少囉！」而小方昨日出席活動時，亦預告會過Lonely Christmas：「未有節目。（有冇約女仔？）冇，有人約我24號下晝打籃球，之後再直落食飯，但我寧願喺屋企食，唔想平安夜成日對住同一班人，或者夜晚轉另一班朋友飲吓嘢。（依家有冇對象？ ）冇。」
前晚出席首映的還有劉浩龍，他透露聖誕要在工作中度過，但有準備禮物給女友容祖兒。問到祖兒是否最好的聖誕禮物？他即時放閃說：「OK呀！」
文：影視組