張敬軒貪靚美容迎第二春
歌手李克勤與張敬軒前晚在頒獎禮上各捧兩獎，其中奪得「最具號召力香港男藝人」的克勤笑說：「我呢啲年紀有番咁上下通常冇呢啲，不過可能今年轉咗公司有啲話題，希望再接再厲。」他帶住最新相機出現，笑指已獲財政大臣（太太盧淑儀）批准買「新玩具」，克勤說：「聖誕嘛，我呢啲麻甩佬借節日搵啲嘢玩。（老婆支持你玩相機？）可能見到我上雪山都孭住『長炮』好感動，追住佢嚟影。」
至於軒仔透露經友人介紹下將接受美容新科技療程：「高電壓嘅電擊，過幾日去做，刺激皮下細胞再生，聽講做完唔使化妝，希望可以素顏出嚟見大家。」自認貪靚的軒仔坦言要迎接第二春：「有高人指點2017年係我桃花年，好期待，直情想聽日就係2017年。（唔驚爛桃花？）好壞一齊嚟，我冇嘢叻，揀桃花好叻。」
