連詩雅揮低金裕貞透視誘遐想

歌手連詩雅、鍾欣潼、韓劇《雲畫的月光》女主角金裕貞、衛蘭、JW、JC、泳兒、鍾舒漫、劉佩玥、張秀文及袁偉豪等前晚出席搜尋網站舉行的頒獎禮，當中最性感的竟然是平時較為密實的Shiga，她身穿透視白色長裙，透出白Bra，成功揮低以心口開窿透視裝上陣的阿嬌，以及打扮密實的金裕貞，成為全場最性感！

阿嬌呻冇男仔約

Shiga憑《舊街角》奪得「十大人氣歌曲」，講到她很性感，她笑言：「呢個係今年第一個頒獎禮，所以隆重其事，係入行以嚟最性感。（有打底？）有呀，但我覺得可以再打好啲，對着透視裝冇乜經驗，搭車嚟嗰陣都有問同事有冇飛咗啲嘢出嚟。」她表示會出席樂壇頒獎禮，問到可有信心得獎？Shiga說：「OK嘅，平常心，都係抱住見同行歌手嘅心情，今年少咗見同行，因為要拍戲同做演唱會。（之後去頒獎禮啲衫會再性感啲？）今日已經好性感，再除唔得掂，呢啲要遮遮掩掩先好睇，如果除晒出嚟冇遐想，做人要留番啲餘地畀自己。」

前晚連詩雅出席頒獎禮披上外套示人。

金裕貞專程由韓國來港領獎，大晒廣東話打招呼。

阿嬌奪得「人氣票后」兼以Twins身份奪得「最具號召力香港組合」，惟蔡卓妍因工作不在香港，只得阿嬌現身。講到她身穿的裙隱約性感，阿嬌稱只是少少性感，問到是否收身成功大騷成果？她說：「其實啱啱做戲院宣傳巡迴已經肥番少少，希望可以喺24號演唱會前減番。」談到下月生日可有慶祝計劃？她說：「未Plan，問咗公司攞假，但未批。（想去旅行？）想呀，已經好耐冇去旅行，需要休息。（有冇男仔約定你？）冇呀！」

金裕貞恨見黎明

至於奪得「年度熱搜韓國新世代女演員」的金裕貞壓軸現身，笑容甜美的她先怕醜用廣東話跟大家打招呼，受訪時透露仍有跟《雲》劇演員保持聯絡，談到她與同劇拍檔朴寶劍入圍《KBS演技大賞》的「最佳情侶獎」，她表示如果可一起攞獎是很好的回憶。問到可有想合作的香港演員？她表示不太了解香港明星，但因曾翻唱過黎明的歌曲，故有機會都想跟對方見面。

文：音樂組　

攝：秦健輝、張福宏