金剛爆呔遭圍攻開腿晒底褲
曾志偉主持的無綫遊戲節目《我愛香港》前晚錄影最後一集，金剛被揭褲襠爆呔，遭眾人合力制服以「腿張開」姿態獻醜，令周秀娜及黃心穎笑到肚攣！
無綫節目《我愛香港》前晚在將軍澳電視城錄影最後一集，由周秀娜、鄭丹瑞、王祖藍、朱咪咪及林子聰等嘉賓與主持作賽。玩遊戲時，動作多多的金剛被麥美恩發現褲襠「爆呔」，他慌忙用物品遮護褲襠，但一班主持卻夾手夾腳令他以「腿張開」姿態獻醜，笑爆全場！金剛笑說：「好彩今日有着底褲啫！」令周秀娜及黃心穎笑到肚痛！至於黃心穎以露肩裝示人，玩拋書包遊戲時相當有睇頭，姿勢美感俱備！
朱咪咪自薦做主角
朱咪咪則向鄭丹瑞自薦取代周秀娜擔任電影女主角，自言很有「彈力」：「周秀娜做到嘅，我都做到！周秀娜有嘅我都有，我都唧到出嚟啫！」而周秀娜將拍攝無綫重頭劇《深宮計》，本身已相當苗條的她自言要為劇集減磅：「希望塊面可以再瘦啲，見到個個女仔都好瘦，所以都要減吓。」又透露聖誕會偕友人去旅行睇北極光：「想睇北極光好耐，終於去到！」
此外，王祖藍最近忙於為劇集《老表，畢業喇！》寫劇本，問到會否到溫哥華出席岑麗香的婚禮？他說：「去唔到，趕唔切，不過老婆喺嗰邊，禮物等老婆負責。」另外，主持曾志偉答謝觀眾支持，希望他們繼續發揮香港人精神，阮兆祥則笑說：「我聽高層講好似話添食，遲啲會開《我愛九龍》、《我愛新界》！」
文：影視組