《星魅博》：紅姑 琦琦中性魅惑
東網巨星全新娛樂節目《星魅博》播出後反應熱烈，深受觀眾歡迎，每集均請來時尚達人，為大家逐一點評不同女星的衣着打扮，並帶來最潮、最in的潮流小tips！本周請來星級造型師郭慶彬（Ricky）擔任客席主持，為大家介紹中性打扮。他大讚大美人鍾楚紅黑白pantsuit發揮到瀟灑型格氣場，名模琦琦透視領口帶出健康性感，各具美態。
鍾楚紅佢着咗一套黑白色pantsuit，覺得佢真係發揮到瀟灑型格氣場，第一樣嘢，黑白色會着得沉悶似返工，但佢一套suit比例啱啱好，另外，亮點當然係佢對高踭鞋，對鞋係一對閃令令露趾涼鞋，令到成個look完全冇咁悶，望落去幾party幾有型，最緊要係佢演繹到時代感。
琦琦呢個boyish style我都幾鍾意，其實有啲性感元素，中間領口位都幾低，着出嗰種健康性感感覺。佢個袖位有啲details位喺上面，望落去好stylish好有型，好鍾意佢着連身褲，佢本身個人比較高，着呢類連身褲特別好睇，加埋長頭髮，型格妝容，成個look同造型好有大將風範。
曾昭亮呢一種打扮其實最受女士歡迎，簡單討好，一件白背心襯深色suit，基本上好容易着同最穩陣，我覺得如果佢加條choker，加啲銀色飾物，效果更stylish同時尚。我幾鍾意佢嘅髮型同化妝配合得幾好，呢樣嘢一定要讚。
馬詩慧我覺得佢呢個打扮好襯佢，平時見佢着黑色深色打扮，今日佢套粉紅色suit正正示範到剛柔並重嘅感覺，瀟灑得來都好時尚，同埋套suit好啱佢，着得比例修長之餘，同埋呢條闊腳褲好難carry，冇五呎九嘅女仔真係唔好試。
舒淇呢件紅色suit好啱佢，着得好好睇，佢雖然唔算好高，但呢套衫令佢比例修長，至於焦點當然係佢嘅蝴蝶恤衫，今季比較流行，紅色西裝褸亦特別搶眼，示範出女性化，亦都有中性感覺，我覺得佢一樣着得好好睇。
