林作執三攤箍麥明詩 敗家仔照做！

大律師林作早前被爆與港姐麥明詩分手，但仍經常被拍到約會，關係欲斷難斷！大前晚臨近麥明詩生日，林作被發現到尖沙咀海旁與一班友人在露天茶座聚會，同場還見到DJ陳達仁與安采妮。現場所見，西裝骨骨的林作與陳達仁狀甚老友，不時大聲講大聲笑，又攬頭攬頸。談天期間，一班人拿出類似劇本看並討論，其後陳達仁與其他友人各自去傾電話及煲煙，只餘林作與安采妮孤男寡女，單身的安采妮即向「筍盤」林作發動攻勢！除了主動坐埋身外，還拿出電話「集郵」及疑似「抄牌」，但心繫麥明詩的林作對安采妮反應冷淡，最後一行人傾足兩小時才走人。

拍五日片酬三萬

據可靠消息指，林作正部署進軍娛樂圈，似乎想與麥明詩「同聲同氣」，希望成功箍煲！當晚一行人是討論林作的處男作、暫名《敗家仔》的微電影，日內將出發到澳門拍攝五日。林作在片中飾演的男主角是一名敗家仔，造型跟其平時官仔骨骨的形象截然不同。微電影原本屬意由游學修或黃又南演出，但兩人未能抽出檔期，有份參演的陳達仁遂邀請老友林作「執三攤」演出，兩人一拍即合。林作今次認真抵得諗，皆因身為大律師的他平日向客人提供法律意見，每小時收費由三萬元起跳，但今次拍五日、日日拍足12小時都只是收三萬元酬勞，時薪只得500元，但為箍煲就冇計！

安采妮集完郵想抄牌，「見過鬼」嘅林作急急Say No！	林作與陳達仁及安采妮傾劇本，大聲講大聲笑。	麥明詩相約髮型師及化妝師歎茶，但見到記者即嚇咗一跳，有咩唔見得光先！

阿媽請埋經理人

據知，林母十分支持愛子入行，昨日更出招邀請陳達仁擔任經理人，為全面進軍娛樂圈的乖仔鋪路。記者向陳達仁求證，他透過電話承認即日起成為林作的經理人，並多謝林母賞識，又讚林作可塑性高：「佢對唱歌、演戲、Talk Show都掂，讀大學都玩過Drama，今次拍微電影係踏腳石。（佢介唔介意同麥明詩合作？）絕對唔抗拒！唔會錯過任何合作空間，其實好希望佢嚟緊嘅頭炮作對手係麥明詩！」但他仍會兼顧大律師的工作。

放大圖片	林媽媽誠邀陳達仁做乖仔的經理人，進軍娛樂圈。

另外，麥明詩上周五相約髮型師及化妝師現身九龍區商場，穿上短裙晒腿的她與兩人先到食店醫肚，其後轉場到附近餐廳歎茶，期間被問到會否與林作慶生，她避而不答，只笑笑口表示與髮型師及化妝師往傾工作。

文：音樂組　

攝：追蹤組