你着我又着！「睡衣解碼」為舊愛
Fashion嘅嘢，我Nuts哥唔係識條鐵，好似睡衣成為今年Fashion Item咁，不過係咪着得出嗰種味道，都要睇閣下嘅Mix and Match功力！尋日我Nuts哥喺屋企着住睡衣Hea歎紅酒時，睇到東網出Push，大大個標題話《新婚大劉着睡衣帶甘比「夢遊」出巡》，嚇到我幾乎倒瀉杯酒。再睇真啲，大劉藍白色條紋睡衣，配上一對着咗至少三十次（可能本身有三十對）、無論出入飯堂、醫院或酒店都會着嘅Loafer，仲要着鞋又着襪，左髀同右髀之間夾住支拐杖，冇錯，係拐杖！唔係湯壺！淨係呢點已經強化晒成個Pajama Set啦！
大「藍」人愛挑機
大劉同老夫子一樣鍾意着同一款衫，不分春夏都係Hermès藍Tee玩「大藍人」Look，可能見到昔日紅顏知己關之琳最近都設計睡衣啦，人着我又要着，終於的起心肝打破老夫子定律，尋日出關同甘比首次以劉氏夫婦姿態出巡時，就索性以呢個五「肢」（第五肢係乜？咪亂諗啦，拐杖咋！）睡衣Look上陣，將歐美潮流親自引入全港九！有錢買名牌又點，亂咁着晒上身唔代表好睇嘅，成六十幾歲人、孫都有埋，着衫都咁有玩味咁玩嘢，有心有力，我Nuts哥真係要講個伏／服字，係伏定服？自己諗啦！
話時話，結婚簽字都匿喺屋企，點解又出關嘅？可能世事真係多巧合啦，蔡少芬前日被問大劉再婚，當場落閘拒絕回答都好正常，尋日更晒同老公張晉啜啜相，即係話畀大家聽，佢比大家想像中更加堅強，兩夫婦不知幾Sweet！點知唔夠兩個鐘，又會咁啱大劉着住睡衣同甘比去港九打卡，油錢連隧道費用計埋，呢個港九蜜月「示威」遊120蚊有找，真係抵玩！人晒佢又晒？係咪咁巧合？我Nuts哥唔會斷估，只係有人過往係有鋪挑機癮！好似當年李嘉欣結婚，有人覺得新郎不是我，得唔到個人同個心，咪出嚟散吓心行個圈囉，人哋樓上擺酒，佢喺樓下睇袋仲要任影唔嬲。明啦！