Jessica智破電騙案 警察上門嚇親媽咪
組合Suepr Girls（SG）昨日與師妹陳詩欣及許廷鏗等歌手出席宣揚滅罪禁毒音樂會，SG成員Cheronna及Heidi分別病倒及有朋友結婚而缺席。近年電話騙案層出不窮，SG成員Jessica早前亦接獲內地號碼騙徒來電，醒目的她本住做好市民本分，遂假扮認識對方來套料，一直採取主動的她成功「引導」騙徒交出聯絡號碼及內地戶口，不過Jessica拖足兩日，最終騙徒知道自己「中招」而Cut線。
伸張正義的Jessica隨即打999報警，三名警員登門了解及帶她往警署錄口供，嚇得不知就裏的蔡母以為女兒犯罪被拉，Jessica說：「工人姐姐同媽咪講有警察上屋企，媽咪打電話嚟問咩事，係咁鬧同埋叫我唔好搞咁多嘢。」並透露為免被鄰居及保安誤以為她犯罪，主動要求與警員前後腳落樓兼在屋苑外上警車返警署錄口供，Jessica說：「畀人見到好尷尬。」至於成員Yanny透露近月受鹹濕電話騷擾，她說：「不停打嚟講鹹嘢，維持咗成九個月，依家唔識嘅電話唔聽。（唔改電話號碼？）號碼用咗好耐。」
