自揭家醜累紅顏 都唔化嘅！

有誰想傷疤再被觸碰

想當年蔡少芬成為港姐季軍，青春可愛卜卜脆，始終只係得十七歲，真係少不更事兼入世未深，又點會帶眼識人吖！就算大劉當年幫蔡少芬阿媽還賭債都好，蔡少芬從來唔會翹埋雙手飯來張口，反而憑自己努力自力更生！大家真係有眼睇，今時今日蔡少芬呢個名喺中港台無人不識，同老公張晉吸金好似吸濕機咁犀利，仲有一對可愛嘅囡囡！就算佢以前曾經得到大劉嘅幫助，都已經係好多年前嘅事，佢咁努力憑一雙手去建立豐盛人生，請問有邊個成日鍾意記住落難受氣嘅日子？但係往往有人鍾意發吓噏風，無形又再次觸碰到人哋嘅傷疤！己所不欲，勿施於人，做咗六十幾年人所謂見慣世面，呢啲人情道理唔係唔曉嘛？

之前因為健康問題而出唔到庭嘅大劉，飲個茶行步路都要篤住拐杖兼十個八個人睇住扶實，經歷咁多嘢，都好應該明白錢真係唔係大晒，健康先係最寶貴，慳番啖氣暖吓肚啦！但佢又故態復萌晒命晒幸福，讚甘比唔貪錢純過蒸餾水，仲話幾年前已經計劃結婚，噚日仲公布埋早幾日已簽字。

大劉上一次結婚都已經係上世紀、39年前嘅事，當時甘比都未出世。大劉今年六十有五，臨老做多次老襯，點解今次簽字竟然咁低調、要匿埋喺屋企搞？又話幾年前已經計劃結婚，應該搞場大龍鳳出嚟先合晒佢河車啦！乜原來計劃咗幾年、就係計劃喺屋企結婚？唔通要花幾年時間裝修客廳同廚房先結得？尋日甘比以女主人身份出嚟公開活動，之後聲都唔聲就走咗，但唔夠幾粒鐘就承認已經同大劉簽字，仲話要珍惜同老公將來嘅每分每秒！有喜事喎！我Nuts哥都惟有講句恭喜，睇吓大劉今次結婚，係咪真係可以白頭到老咯！