黃翠如出賣蕭正楠變態！

無綫花旦黃翠如在台慶劇《幕後玩家》的角色「顧成雙」最初開朗樂觀，到後來慢慢現形，走上「魔鬼之路」望擁有全世界，更背棄男友蕭正楠（Edwin）演的角色「馮汐然」，搭上同樣利欲薰心的黃宗澤（Bosco），對演慣正面傻大姐的翠如來說，今次絕對是大突破，令觀眾意想不到！

Keep住內疚

翠如直言處理角色難度甚高，有段時間負能量爆燈，她說：「成雙性格思想複雜，想掩飾自己陰暗面，甚至有啲變態，但我真人簡單好多，拍攝嗰六個月一直心裏好難受，情緒難過，其實成雙係悲劇人物，佢都討厭自己咁魔鬼，但控制唔到。（同Bosco有冇親熱戲？）我哋唔係呢啲，係互相利用，我哋都想做幕後玩家。」劇情發展到後期，翠如露出狐狸尾巴，更狠狠傷害Edwin，她直言非常內疚：「嗰段時間我哋見得唔多，一見面就係成雙同汐然，關係好似有啲虛假，劇中仲要利用佢。（內疚？）Keep住都有呀！但角色又覺得理所當然咁，感覺好變態。（影響雙方關係？）又唔會，但佢同我講我成日好難過咁，佢係個好好嘅心靈導師。」

放大圖片	黃翠如談到劇中出賣蕭正楠，搭上黃宗澤，感到內疚。	黃翠如一笑，傻大姐Feel又返嚟喇！

冇咩興趣贏視后

罕有演壞女人，翠如笑言不怕Fans不接受：「開心聽到大家唔同嘅意見，街坊朋友見到我都有鼓勵。（歡迎大家鬧你？）期待！今次我獻出咗好多第一次，例如食煙同打鼓，希望演好角色。」講到付出甚多，問會否想有獎項肯定？翠如說：「完全冇諗，太多人比我厲害，有觀眾、幕後、前輩讚一句已經好足夠。（冇Set過視后目標？）冇咩興趣去贏，我鍾意中間位。（想蕭正楠有獎多啲？）我哋傾過，依家最想係將所有福氣畀晒曹永廉，希望佢有獎！」

文：立影

攝：劉斌

服裝及飾物：MAX&Co.