劉詩昆孫穎靈魂侶伴

如果說音樂可以打破語言地域的界限,那麼愛就是無所不能!現年77歲的「國寶級鋼琴大師」劉詩昆與41歲的「琵琶公主」孫穎始於音樂,無視36載年齡鴻溝,共歷14年風雨,感情早已昇華至靈魂伴侶,孫穎強調兩人毋須白紙黑字的誓詞,已有照顧對方一輩子的決心,陪伴就是最長情的告白。

劉詩昆、孫穎結緣於2002年的一個周年晚宴上,他對演奏琵琶及鋼琴、精通中西樂器的孫穎甚是好奇,主動通過中間人找她,成就了這段忘年之交。而孫穎對劉詩昆的第一個印象是:「好多人覺得佢好威嚴,但我見到佢嘅笑容,覺得佢好純真。」音樂才華令兩人愈走愈近,人格魅力令他們走得長久,劉詩昆大讚孫穎是性情中人,又直又真:「佢對我唔係為名為利,以前追佢嘅男人,比我有錢嘅大有人在,佢係喜歡我嘅人格同藝術氣質,佢懂得我嘅價值。」

為上市先會結婚

孫穎自問有精神潔癖,認為只從外表及物質去找尋另一半,關係並不持久:「我哋呢種靈魂伴侶(Soulmate)好珍貴,精神上離唔開對方。我哋識咗十幾年,依然可以煲五個鐘頭電話粥,又可以一人一書各自睇,唔講嘢都得。」當愛情昇華到某一層次,結婚對他們來說,已失去了意義,孫穎說:「就算要結婚都唔係為咗維繫感情,可能係為咗公司要上市,感性嗰部分唔需要靠結婚,我哋唔結婚,都會照顧對方一生一世,無一紙婚書反而更享受!」至於生兒育女,喜歡小朋友的他們有考慮過,孫穎說:「唔係非要不可嘅,養兒防老呢個觀念已經過時,冇都唔會覺遺憾。」

錢銀從不分你我

劉詩昆與前妻蓋燕鬧離婚之時,孫穎守護在他身邊、不離不棄,卻被冠小三之名,對此,孫穎以「配得起最好,承受得起最差」的心態去面對:「我從佢身上得到好珍貴嘅力量,無所懼怕,你鍾意話第四、第五者都好,我好清晰自己做緊乜,事實上最了解我哋嘅只有我哋兩個。」當時孫穎出錢出力為劉詩昆渡難關,但不存在「幫」這個字眼,而是不分你我:「佢當時啲錢被凍結咗,我就叫屋企人拎晒所有流動資金出嚟,感覺到大家一條心,嗰種力量係好大!」劉詩昆坦言經濟上兩人完全透明,沒有0.1%去防對方。

孫穎認為幸福是每朝起床,很怕失去對方,若然沒有對方,還可以跟誰傾訴?而她身邊正好有劉詩昆:「我喺16歲時寫日記,已經寫低最欣賞嘅男性要有1米8以上身高,仲要懂得彈拉赫曼尼諾夫嘅樂曲,後來發現世上能符合呢兩個條件嘅,就只有劉詩昆一個,所以,點可以唔珍惜佢!」

文:名人組