張紋嘉(目及)仔面紅
歌手張紋嘉到美國紐約修讀演藝課程，已經過了3字頭的她自爆是班中年紀最大一個，同學們讚她有「童顏」，也欣賞她的勇氣，對她加以照顧。重過校園生活的她非常愉快，還不時(目及)靚仔，搞到面紅耳熱。
想由歌手轉型做演員的張紋嘉（Crystal）之前飛到美國紐約電影學院，修讀一個為期8星期的演藝課程，早在兩年前她已有這個計劃，但曾經遭朋友潑冷水：「有朋友話都冇人搵你做戲，你嚟緊又唔係有戲拍，呢行演戲唔使讀，但我覺得唔係，我好想進步。」Crystal近年做過幾齣舞台劇，但電影方面機會較少，所以就把心一橫讀一個關於電影的課程：「學到好多嘢！」
班上年紀最大
Crystal表示班上11個同學，分別來自不同的國家、地方，亞洲人得她與一個韓國同學，她自爆班裏面自己年紀最大，今年31歲的Crystal笑說：「一開始介紹自己，老師都話如果你唔想講自己幾歲，可以唔講，我覺得講又有咩所謂啫，但當我講咗個個都好愕然，因為所有同學都係21、22歲，有啲24歲，佢哋覺得我個樣唔似，去到呢個年紀仲嚟讀書，佢哋覺得我好有勇氣，可能我個樣又細，又細粒，有啲同學仲好照顧我，感覺好得意，好似變番細個返學咁。」她坦言讀書生活好簡單，一班同學相處好融洽，不會似演藝行業會鬥、會爭拗，所以她覺得好舒服。
行路撞垃圾桶
Crystal在學校都有(目及)靚仔，尤其隔籬班有幾個好靚仔的model，她笑說：「佢哋嗰班係讀一年，聽聞佢哋準備真係做演員，佢哋仲有獎學金去讀，真係好靚仔。個情景係你行走廊時候，明明同人哋講緊嘢，突然見到個靚仔，自己笑咗塊面紅晒，會即刻拍隔籬個女仔：『快啲望吓啦！』最搞笑企前面個女同學啱啱行到轉彎位，擰轉面想同我哋講嘢，佢就撞到個垃圾桶，呢啲情景係細個讀書時先遇到，真係好搞笑。」
文：音樂組