曾志偉孖長髮女搭膊睇家品
曾志偉昨午現身日本大阪，與一名長髮女子狀甚熟落地結伴行家品店，兩人全程有傾有講，甚為投契，女友人更一度搭住志偉膊頭，身為高知名度藝人的志偉，迅即吸引不少遊客舉機拍攝。
剛失落金馬獎的曾志偉，昨午被讀者發現身處日本大阪堀江，與一名身高相若、穿上黑皮褸襯黑長裙的長髮四眼女子行家品店，兩人睇完裝飾品又睇煮食用具，未幾連潤膚露及香薰都睇埋，期間兩人有傾有講，不時細細聲研究新產品，平時愛玩的志偉對家品原來非常有興趣，一度踎低慢慢揀茶具。
啱傾笑唔停
志偉和女友人睇完地下樓層，再步往樓上參觀，繼而又落樓睇多陣，於店內逗留約一小時，二人全程表現投契，經常傾到笑不停口，而女友人更一度熱情地搭住志偉膊頭，未幾陸續有遊客認出志偉而舉機拍攝，兩人顯得不自在即付款離開。
常結伴出埠
翻查資料，原來和志偉同遊日本的正是其御用化妝師Vanus Li，兩人經常因公事結伴到處飛，足迹遍布各地，據知Vanus丈夫亦是圈中知名化妝師，惟於兩年多前不幸猝逝，面對至愛離世的Vanus一度深受打擊，其後終走出傷痛，勇敢面對人生，再度投入自己的化妝事業。
文：追蹤組