美國樂壇天后Katy Perry日前被拍得跟拍拖11個月的型男奧蘭度布林十指緊扣蒲吧，Katy左手戴上巨型黃色鑽戒，因而爆出兩人已訂婚的傳聞！
32歲人氣歌手Katy Perry周一晚與39歲影星男友奧蘭度布林（Orlando Bloom）十指緊扣現身紐約一間酒吧，兩人笑到四萬咁口，不知幾Sweet！Katy雖然右手拖到奧蘭度實一實，但重點其實在左手，事關她被拍得戴上一隻超搶眼的巨型黃色鑽戒，全程不介意狂騷左手任影，因而傳出兩人已秘密訂婚！據身邊友人透露，Katy前所未有咁開心，離開時與奧蘭度笑住上車勁風騷。
爆出訂婚後，Katy與奧蘭度前晚結伴出席在紐約舉行的年度聯合國Snowflake舞會，獲頒「柯德莉夏萍人道獎」的Katy穿上香檳色低胸花裙，拋出半球吸睛，但就收起黃色鑽戒，跟奧蘭度亦前後腳現身，似乎怕被追問訂婚一事。頒獎禮上，美國總統大選中落敗的希拉妮（Hillary Clinton）突然驚喜現身向Katy頒獎，自大選後首次公開出席活動，致詞時說：「個人來說，我好難表達能夠替呢位國際巨星、社交網絡女王慶祝有幾咁開心，佢擁有最多嘅Twitter追隨者，雖然現時地位受到威脅。」暗示候任總統特朗普（Donald Trump）成日玩Twitter！希拉妮讚Katy透過聲音及歌詞帶給大家正能量，搞到Katy聽到眼濕濕！事後，Katy受訪時談及奧蘭度現身支持：「佢係去年嘅得獎者，擔任聯合國大使超過10年，我只係做咗幾年，所以我哋彼此教識對方好多。」同場還有女星Maggie Q等。
另外，國際內衣品牌Victoria's Secret（VS）將於法國時間周三在巴黎開騷，奧蘭度趁機抽水，上載頭戴粉紅兔仔耳頭箍的照片賣萌並留言：「估吓今年邊個為VS騷打頭陣？」並Hashtags指自己是「Orlando Hadid」，實行與有份行VS騷的超模Gigi Hadid與Bella Hadid扯上「關係」。
文：外娛組