怕囡囡悶JC氹安志杰聖誕再送B
警鐘胸模Jessica C.（JC）和未婚夫安志杰（Andy）情侶檔出席活動，現場兩人如糖黐豆，恩愛爆燈，更情不自禁多次咀嘴。事後Andy坦言兩日冇見，已好掛念JC母女，JC即大讚他100分，更冧爆揚言聖誕再送BB。
昨日Jessica C.（JC）和安志杰（Andy）出席新城市廣場「璃光星河Milky Way In Town」浪漫燈飾星級體驗日，成為首對星級訪客。兩人雖已榮升父母，育有一女Tesse，現時8個月大，但昨日兩人仍十分sweet，一時十指緊扣，一時Andy攬着JC腰肢。由於現場空曠較大風，穿露肩裝的JC猶如小鳥依人，不時順勢將頭枕在Andy膊頭上，更連環咀嘴變接吻魚，不停放閃。期間二人又拿着「璃光星願球」放入現場的浪漫人造愛河中許願。Andy說：「我希望以後可以抽多啲時間陪JC和Tesse。」而JC則希望Tesse快樂成長。
想囡囡叫媽咪先
一直在外忙拍戲的Andy，坦言冇見JC母女兩日已感覺好耐，認真一日不見如隔三秋：「之前不停飛寧波，好耐冇見佢哋，（幾耐？）兩日，之前仲長成十日。（見少一日好掛住JC？）唔止掛JC，都掛BB。（有冇同佢哋視頻？）有啲地方收得唔太好，唔可以成日視頻。」問到莫非怕錯過聽BB叫爸爸？Andy說：「希望BB第一句叫媽咪先，因為JC照顧囡囡功勞大。」兩人已計劃聖誕和新年返美國度假一個月。對於Andy被形容為絕世好男人，JC亦公開大讚未婚夫，給予對方100分。
生仔女冇所謂
JC表示自己最鍾意的節日是聖誕節，並已準備了驚喜禮物給未婚夫，問是否送多個BB給對方？JC爽快說：「係。」Andy說：「我哋兩個都想再要BB，覺得BB一個會好悶，有個妹妹或弟弟好啲。」JC表示仔女都冇所謂，因為自己也有姐妹，可以像朋友般一起成長更好。
文：名人組