苦情大婆龔嘉欣齋摸冇幫襯
龔嘉欣近期演苦情大婆，哭功厲害贏盡觀眾讚賞，人氣急升的她日前相約糖妹行街買底衫，當日一身密實打扮，外套拉到上頸，依然吸引不少途人目光。為打好個底，嘉欣專揀保暖底衫，不時攞上手又摸又搓試質地，睇完又睇但最後都係混吉走人。
無綫姐仔龔嘉欣於近期熱播劇集《幕後玩家》中演技大受好評，劇中飾演苦情大婆的她，面對花心老公黃宗澤心碎爆喊，觀眾大讚她哭功厲害，更力推她與王君馨爭「最佳女配角」。事業攀上小高峰的嘉欣人逢喜事精神爽，日前心情靚靚相約好友糖妹行街買底衫。
吹水表情多多
嘉欣當日下午3時多穿上吸睛桃紅色外套現身尖沙咀，急步會合好友糖妹，兩人有傾有講地齊齊先去銀行，然後到附近的咖啡店吹水，一人點一杯飲品，傾足個半小時。期間嘉欣表情多多，一時皺眉，一時又苦口苦面，似乎相當多心事和老友分享。雖然嘉欣當日打扮密實，外套拉到上頸，但人氣高企的她仍全程吸引途人眼望望。
揀衫着重質地
嘉欣和糖妹歎完茶便到時裝店揀底衫，兩人專攻保暖系，為打底做足準備。只見嘉欣對質地相當着重，拿起底衫又摸又搓試清楚，揀足半小時最後都混吉齋睇冇幫襯。她其後陪糖妹步往附近的商業大廈，繼而自己往停車場取車走人，直返位於將軍澳的寓所。
文、攝：追蹤組