柏豪婚後趕開工冇時間造人
歌手周柏豪上周六低調與拍拖10年的圈外女友Stephanie在布吉結婚，完婚後未有時間去度蜜月，便即返深圳為無綫新劇《使徒行者2》開工。昨晨約9時，柏豪坐車到達深圳郊區一家名為金茂園大酒店開工，甫落車見到有十幾位傳媒守候的柏豪，似有備而來，貫徹低調作風，未有戴着結婚戒指，當記者問到手上為何未有結婚戒指時，他表示因為要拍劇，怕整花隻戒指，所以暫時除低。
今次低調結婚，柏豪稱婚禮其實籌備了近一年，雙方親友有出席，不過他和老婆不想大搞，加上場地有限，所以只請了最親密的朋友出席，奈何婚禮被報道，他說：「做得藝人都預咗會被揭發、被曝光嘅一日。我係一個有計劃嘅人，做得呢件事，都預咗畀人知。（周太有冇唔開心？）佢冇乜所謂，就算畀人影到都冇咩唔開心。（補擺喜酒？）唔會。（幾時生B？）起碼都要拍完《使2》先，因為真係冇時間！（度蜜月呢？）我哋成日都去旅行，所以都冇特別計劃喎。」