出海漂白衰佬變羔羊！

學利智話齋，一切都係從陰毛（謀）開始。陳曼娜女婿Dicky嘅舊愛金小姐，前日先至鬧爆Dicky係欺騙感情嘅衰佬，但係尋日就轉口風，話Dicky係慘慘豬嘅羔羊！衰佬變羔羊？有冇變得咁快呀？金小姐親自為Dicky「洗白白」沉冤得雪，承認係自己一手策劃嘅陰謀，仲鬧自己荒謬同卑鄙！因為同男友鬧交，又唔抵得舊愛Dicky娶老婆，金小姐一時衝動就自編自導自演呢場大龍鳳，如果Dicky同老婆Joie信任唔夠，呢段良緣就被金小姐一手摧毀！呢場鬧劇暫時算係畫上休止符，不過唔少老友名偵探柯南上身，話身為內地人嘅金小姐應該寫開簡體字，但係見Dicky尋日出示金小姐認錯嘅短訊，全部都係繁體字，話覺得相當有嫌疑喎。

「舊愛做朋友」小心賴嘢

真真假假，得當事人知，不過我Nuts哥覺得Dicky非常高招，將自己隻遊艇變為「洗頭艇」，呢單鬧劇搞到自己由頭到腳都係屎，為咗解畫洗白，安排記者上自己隻艇開記招，睇住維港景色吹吓海風伸冤。人齊開船玩環島遊，爭啲好似賭神咁將條船開到去公海咁滯，Dicky都好好招呼o架，買成300幾蚊磅嘅日本岡山縣晴王提子同名牌朱古力，不過如果少啲體力，班記者分分鐘搖到又暈又嘔，想腦筋急轉彎問多幾句料都唔得啦！點都好，計我Nuts哥話齋，任何時候都要識得轉身射個三分波，將危機變生機，咁先至最實際！

Dicky話同金小姐相識一場，見金小姐唔開心，本住朋友身份出嚟支持吓，點鬼知會賴嘢畀人利用造新聞？舊歡如夢，老友問我Nuts哥，萬一舊愛喊苦喊忽打嚟求救點算？嘩！我Nuts哥講晒啲絕招你聽，就唔係絕招啦，自己執生啦！不過，出去見吓面慰問吓舊愛，都係可以諒解嘅！但係最好就唔好畀另一半知喇，夜長夢多，明o架啦！再唔係，為免有嫌疑，閣下帶埋老婆仔女一齊去囉，又或者FaceTime玩視像，咁就唔使煩啦！