千嬅遺傳基因 囝囝唔黐家
楊千嬅昨日出席聖誕活動，透露自己和囝囝都很愛聖誕節，期間更大爆囝囝創意十足，曾把全家人及朋友的相片掛上聖誕樹作掛飾。她又笑言囝囝遺傳了自己愛躝街的習慣，經常都去Party玩。
藝人楊千嬅、游學修及羅孝勇昨日出席時代廣場白色聖誕節亮燈儀式暨「聖誕雪樂園」開幕禮，受訪時千嬅透露自己與囝囝Torres都很喜歡聖誕節，因為可以參加很多Party，現時都要開始準備買禮物過節。她又大爆之前囝囝在學校整聖誕樹掛飾的趣事：「佢剪咗有我個頭啲相黐喺掛飾上，然後再掛上聖誕樹，仲將全家人同朋友嘅相片都掛晒上聖誕樹。其實成件事好奇怪，但係又唔想小朋友失望，所以由佢發揮吓創意力。」她又踢爆囝囝遺傳了自己喜歡躝街的習慣：「成日都去Party，佢都試過好多唔同嘅角色扮演。」
聖誕想砌雪人
喜愛白色聖誕的千嬅亦坦言如果在北海道過聖誕就很浪漫，她說30歲前曾玩過幾次砌雪人，但自此再沒試過，笑言：「如果同我老公（丁子高）講，佢實問我係咪唔舒服，佢最憎凍。（等囝囝大啲你哋可以過二人世界？）我到時都漸漸大，唔知行唔行得郁，費事畀人笑兩個老人家玩雪。」而講到她忙於跟余文樂拍攝電影，她表示已拍攝了一半，大家很有默契。講到她與樂仔有床戲，她表示老公最近很忙：「所以冇點留意，但佢都好支持我。」
游學修唔留戀過去
另外，同場的游學修早前與蘇麗珊甩拖，問到他今年是否要單身過聖誕節？他表示聖誕要在工作中度過，問到會否覺得寂寞？他謂：「其實過咗廿幾年聖誕都係自己過，或者同屋企人過。（今年覺得特別傷感？）唔會嘅，都事過境遷，睇吓約唔約到女仔囉。（冇咁快想拍拖住？）依啲嘢要睇機緣巧合，耐起上嚟可以幾年，快起上嚟可以好快，最緊要夾，做人嘅嘢留戀過去唔係太好。」他亦透露最近忙於拍攝劇集，稍後則會開始拍電影。
文：音樂組