藝人溫碧霞前晚飛抵東京，碰巧於本港時間昨晨4時59分，日本福島縣對開海面發生黎克特制7.3級淺層地震，溫碧霞當時身處酒店51樓，亦有感到震動。震後她在社交網站報平安，並透過短訊憶述地震經歷：「我成晚都瞓唔到覺，突然感覺到地震，成幢樓搖得好犀利，好似就快冧咁，好得人驚！搖咗差不多幾十秒，搖到我醒嗰陣都暈暈哋，當時好驚，唔敢郁又唔敢開燈，之後我睇電視先知係7點幾級地震，嚇咗一跳，經歷呢件事更加覺得要珍惜生命。」
