三舊水拆掂使乜打官司！
唔睇Nuts哥就話咗會蝕底啦！大劉呢場花生騷，我Nuts哥做足功課，唔好話我牙擦擦啦，我都有同啲律師朋友傾開「事實婚姻」喺香港根本唔適用，若日後法庭干預，都係以一對仔女嘅利益為法律着眼點。大劉與其搞咁多花臣又預防打官司、又出聲明，不如一早就乾乾脆脆同甘比結咗婚好過，就唔使晚晚瞓唔着，驚人分身家。點知佢真係上星期五就靜雞雞走去入紙註冊，其實一早要咁做啦！咁就唔使連家醜都揚埋出嚟，仲話留定一百億打官司，家吓用三舊水註冊費就拆掂，如果醒目一早搵Nuts哥咁食腦嘅傾傾，就唔使做場大龍鳳畀人睇啦。
65歲再婚追多件啦
雖然65歲再婚，Nuts哥都戥佢開心，話晒過咗花甲之年，仲搵到個細佢28年嘅少妻，呢段時間大劉讚甘比又聽話、又乖、又唔貪錢絕對娶得過，不過Nuts哥就無限唏噓，想當年呂麗君為咗佢單官司，做跑腿，出咗唔少心力，點知最後落得如此下場，仲畀人話貪得無厭，開口埋口錢，又話畀咗廿億佢都唔夠，見到呂麗君咁樣，Nuts哥就真係祝甘比好運，要引用呢句：「我真係恭喜你啊！」
睇見之前大劉出入都要人扶，又要坐輪椅，仲要喺「自己飯堂」門口仆親，又周身病痛，連官司都出席唔到，點知爆咗單家醜出嚟，連個腎都換埋，原本氣若游絲，突然間中氣十足，眼仔睩睩，Nuts哥睇到佢咁生猛，有腰力有腳力，唔使相士批，再婚之後分分鐘再做老竇，到時又有得剝住花生等睇戲。