Chrissy冇打底衩錯腳走陰

《美國音樂頒獎禮》（AMA）於洛杉磯圓滿舉行，Ariana Grande獲封年度歌手，Justin則橫掃四獎包括最受歡迎流行音樂/搖滾男歌手獎，但因在蘇黎世開騷而未有現身。獲得最多十三項提名的Drake最後只捧走三項個人獎，另憑與前女友Rihanna合唱的《Work》獲最受歡迎騷靈/R&B歌曲獎，但對方未有到場領獎。

轉身掩裙自救

頒獎禮不只「成績表」矚目，眾星盛裝上陣同樣吸睛，其中人氣女模Chrissy以超性感戰衣現身，力撐有份表演及爭獎的歌手老公John Legend。與John誕下一女仍然身材Fit爆的Chrissy毫不吝嗇，高衩裙開到上腰Chok出「祖莉腿」，配合大露背設計，可謂全場最火辣！可惜一寸短一寸險，Chrissy因動作太大而不慎「失守」，露出未有打底的私密部位，轉身掩裙都救唔切，John只能眼白白目送老婆走光，未知返家後會否對老婆下「禁露令」？不過，Chrissy席上有份頒獎，邊行邊繼續晒腿，似乎未受洩春光而影響心情。

Ariana獲封年度歌手，表演時都特別落力。（美聯社圖片）	Nicki Minaj又嚟騷招牌巨胸，夠晒動感！（美聯社圖片）	Selena病後復出領獎，一番感言令全場拍掌。（美聯社圖片）

講完火辣就番講番Touching時刻，Justin前女友Selena三個月前因紅斑狼瘡症引發「焦慮症」與「抑鬱症」而入戒療所後首次現身公開活動，獲頒最受歡迎流行音樂/搖滾女歌手獎的她感言指因被病魔打殘而暫別樂壇：「我唔係追求肯定，而我亦唔再需要。只想講我好慶幸有機會同我愛嘅人分享我每日愛做嘅事。我想同粉絲講多謝，唔知自己做過咩去值得擁有你哋，但如果你個人被打殘，你唔需要一直保持被打殘！我有一樣嘢你應該知道：『我好關心其他人。』呢個獎係屬於你哋嘅，多謝。」語畢即獲全場歡呼支持，後台更獲英國男子組合One Direction成員舊愛Niall Horan擁抱打氣。

Prince親妹代領獎

此外，已故歌手Prince的家人亦暫停爭產，齊齊現身頒獎禮，由Prince親妹Tyka Nelson代領最佳電影原聲大碟獎。Prince的專輯《Purple Rain》雖已推出逾30年，但在他死後銷量大增，打敗《自殺特攻：超能暴隊》（Suicide Squad）及《星球大戰：原力覺醒》（Star War：The Froce Awakens）的電影原聲大碟奪獎。

文：外娛組