身家逾40億港元的美國天后瑪莉亞卡里（Mariah Carey）出名愛豪歎，入住豪宅之外，連外遊與開騷都不惜豪擲千金住好啲，加上珠寶首飾行頭勁，完全係住得出色、揈得招積！
瑪莉亞最近與富豪帕克（James Packer）分手成為城中焦點，但坐擁逾40億港元身家的她本身不愁衣食，失去金山伴侶都冇有怕！講到享受，她最愛住得舒適，最貴的王宮是位於美國比華利山、價值約9.7億港元的4萬呎大宅The Fleur De Lys，屋內有泳池、網球場及可停泊9架車的車庫等「基本」設施，連圖書館都有！
她在巴哈馬亦擁有約3,800萬港元的度假屋，3,500呎大理石地板加上40呎長無邊際泳池，諗起已經透心涼！
除了買豪宅「長歎」外，瑪莉亞就算只是「小住」都要奢華，今年4月就被爆在巴黎開騷期間，入住日租逾12,000港元的酒店，還在社交網晒命，窗外正正對住艾菲爾鐵塔，正到吖！本已揈慣的她，與帕克一齊時更是「豪上加豪」，曾以月租約193萬港元租住加州18,000呎豪宅，兩口子捉迷藏都有排搵！
此外，瑪莉亞亦愛名貴珠寶，與帕克拍拖初期便獲贈約387萬港元的18卡心形黃鑽頸鏈，去年11月到澳門撐帕克賭場開幕時，又再收閃爆鑽石鏈，至今年1月再收約7,750萬港元的35卡訂婚鑽戒，她不時戴齊行頭上節目，還試過戴滿首飾與名嘴在節目中浸浴，堅浮誇！上月，她又被爆月花約77.5萬港元買花，出海時叫造型師坐直升機送衫上船，連節日擺設亦花費約77.5萬港元，簡直是秒秒鐘倒錢落海！
使錢如倒水的瑪莉亞，對為前夫Nick Cannon所生的一對仔女Moroccan與Monroe當然亦非常鬆手，有指仔女出生前，她已豪花約1,008萬港元在比華利山大宅打造超豪BB房，知情人士指：「佢想間房有18K金同象牙點綴嘅牆壁，仲有大大個放滿名牌BB衫嘅衣櫃，加上鑲鑽嘅iPod同電視，保證BB一出世就有盡高質享受。」
瑪莉亞對寵物一樣冇手軟，不時帶愛犬周圍飛，而且只會坐頭等！早前她被爆每年花約35.6萬港元在愛犬美容上，狗仔都要歎Spa！而終極浮誇莫過於她曾為8隻狗仔安排度假之旅，豪擲約14萬港元在名貴狗酒店住宿，當中包括私家床、一日遊與梳洗服務，還有廚師用有機牛扒為狗仔炮製大餐。她又試過豪擲約94.4萬港元，租私人飛機帶狗仔去旅行！
文：外娛組