袁偉豪匿「愛巢」閉關療情傷
袁偉豪與岑杏賢於社交網宣布結束三年情，震驚娛樂圈。袁偉豪昨日足不出戶「閉關」療情傷，至於好友王君馨、朱千雪、陳山聰及胡諾言對兩人分手大表可惜，希望他們可以快樂，早日找到新的另一半。
無綫藝人袁偉豪、岑杏賢（Jennifer）前晚先後於社交網站宣布分手，三年情就此玩完。兩人分別是香港先生及香港小姐出身，之前經常「糖黐豆」出席圈中好友聚會，是別人眼中甜蜜穩定的一對。袁偉豪亦曾公開表示視Jennifer為結婚對象，想不到現時分手收場。消息傳出後，記者一直聯絡不上Jennifer，袁偉豪則表示不會回應，多謝關心。昨日他們位於將軍澳的「愛巢」外有大批傳媒守候，袁偉豪的私家車及電單車都停泊於停車場，相信都是「閉關」療情傷。
王君馨嘆藝人難拍拖
早前兩人一齊出席朱千雪碩士畢業禮，千雪接受訪問表示：「其實佢哋兩個都係我好朋友，所以我唔方便講太多，但佢哋都好成熟，希望大家尊重佢哋嘅決定，同埋畀多啲空間。」曾於劇集《城寨英雄》與袁偉豪飾演一對的王君馨說：「外界嘅鼓勵或批評都會有壓力，鼓勵就好似催佢哋要做到某個目標，唔睇好又會造成壓力，令佢哋思考係咪應該一齊。」並向他們送上祝福，希望他們盡快找到新的另一半。
經常與袁偉豪跑步的兩名「跑友」陳山聰、胡諾言都表示不方便講太多。山聰說：「我哋唔方便講太多，但祝佢哋兩個都幸福快樂，繼續開開心心生活。」胡諾言亦說：「尋晚都有Whatsapp叫佢take care，雖然冇覆，但男人嘢都係一切在心中。」胡仔又指袁偉豪很疼錫女友：「入面嘅嘢大家唔知，所以唔可以代表佢講嘢，總之成班老友一齊撐佢。」
文：影視組