Bosco缺席宣傳被唱衰 龔嘉欣大爆唇軟腰幼
藝人張繼聰、蕭正楠（Edwin）、陳煒、龔嘉欣（Katy）、鄧佩儀及劉佩玥（Moon）等昨日宣傳TVB台慶劇《幕後玩家》，吸引大批市民圍觀！眾人鬥數缺席的黃宗澤（Bosco）「衰啲乜」，又將印有Bosco肖像的皮球踢來踢去，場面搞笑！阿聰直指Bosco在劇中「食晒啲好嘢」，寸他風流，陸永則笑他「腎衰」，演Bosco老婆的Katy指他衰「唇軟腰幼」，Edwin及阿聰即講黃色笑話，笑Bosco「又軟又幼」！
事後Katy表示與Bosco有拍親熱戲，雖然剪了，但知他腰幼嘴唇軟，她說：「唔抵得佢！（可惜剪走親熱戲？）可惜o架！當回憶啦！」前晚她在台慶騷表演呼拉圈，事後發現腰間瘀黑更明顯，但喜獲不少同事慰問。講到有網友指她腰間唧腩肉，Katy大發嬌嗔說：「服裝問題啫，要表演所以束實咗，我都係23吋腰，大家可以睇番我啲泳衣相，冇Ｐ圖。」又說對身材信心十足。另外，Katy昨晚在微博表示有人以「KatyKumg」的名義到處發放惡意留言，令人誤會是她，Katy在電話中說：「有人喺網上話我點解鬧人，我一頭霧水，原來係呢個人冒充我，Fans話佢唔係第一次扮藝人。」
張繼聰同ＢＢ傾偈
阿聰在台慶騷表演吹口哨，被「胸」湧花旦搶風頭，他笑言不介意，問到若果TVB請謝安琪（Kay）表演性感肚皮舞，他會否接受到？阿聰說：「最好唔好啦！我好清楚太太喜好，佢主力唱歌啦！」Kay的預產期是明年３、４月，他說不再像初為人父時手忙腳亂：「有時我同肚入面嘅ＢＢ傾偈，佢會踢媽咪肚皮畀反應。我都係傾啲無聊嘢，想佢認得我把聲！」大仔第一次Feel到ＢＢ在媽咪肚內，十分驚訝，阿聰指畫面好韓劇Feel：「好感動，要匿埋喊！」
文：影視組