柳妍熙想溝車手玩飄移 薛凱琪聽引擎聲興奮心郁考牌
薛凱琪（Fiona）及柳妍熙（Shay）專程到澳門欣賞賽車，前者雖被引擎聲嚇到失儀尖叫，但刺激賽事令她一睇愛上，有意考車牌；而Shay有幸跟賽車冠軍結緣，揚言恨識位車手男友親教飄移。
Fiona前日到澳門欣賞賽車之餘，又以頒獎嘉賓身份出席電單車大賽，首次落場近距離睇賽車的她，自言初時感覺不大，直至被突如其來的巨大引擎聲嚇一跳，才正式感受到賽車的震撼感：「喺現場聽到賽車啲引擎聲，嚇得我尖叫，後尾到貴賓室睇賽事，終於明白車手得獎後點解咁興奮，雖然比賽有啲危險，但真係好刺激！」
唔奢望做女車神
問到可有心癢癢想落場「鍊番轉」？她帶點尷尬表示沒有車牌：「好多人以為我有車牌，拍戲都揸過車，但我係『無牌一族』，每次拍揸車戲，都要勞煩幾個大漢推車營造效果。」她又稱有學車的心願，一來方便拍戲，二來放假時可載媽媽四圍去，可惜一直沒時間學車，不過將來考獲車牌，也不敢奢望做女車神落場比賽，因賽車非易事。
搵冠軍車手合照
而愛飛車的Shay前、昨兩日留在澳門欣賞賽車，更有機會跟今年升格為世界盃的澳門格蘭披治三級方程式冠軍、葡萄牙車手達哥斯達合照，她說：「其實尋（前）日嚟睇佢排位賽，我都睇好佢，果然佢喺決賽真係贏咗！」問到可期望結識車手男友？她直言：「我細個時真係有嚮往過識個賽車手男友，佢哋好型，好靚仔，依家有機會識，真係可以考慮吓！同佢哋遊車河時，揸到好似賽車咁快，一定好刺激，我諗每個女仔都恨有呢啲咁正嘅男友，同埋男友可以教我揸車，可以飄移吓。」問到可有興趣做女賽車手？她說：「好想，有機會一定落場一試，因為車手啲衫同頭盔都好型，不過如賽車就先要減肥，因為個賽車位好窄，要有苗條身材先可坐得落個車手位度。」
文：音樂組