郭晉安野人爭視帝殺入街市搶票

每年台慶頒獎禮「視帝之爭」都全城矚目，陳展鵬在劇集《城寨英雄》中打到飛起，劇情緊湊好睇，收視口碑均獲好評，順理成章是視帝大熱，但中途殺出「渠頭」王浩信被指以續約換獎，但其實視帝之爭還有三屆視帝郭晉安！

叉燒送埋口

昨晚播出的台慶劇《致命復活》，安仔的深山野人Look正式在劇集內曝光，與萬綺雯重逢的劇情感動不少觀眾，安仔為演活長居深山十年的野人，刻意激減28磅，搏到盡的他絕對有機會截擊展鵬，第四度登上視帝寶座！

在劇集首播前，安仔再度野人上身殺入街市，昨早上八時返到無綫化妝間作準備，只需一小時便「變裝」成功，更示範自己戴假髮：「好先進o架，唔使人幫，好似戴帽一樣！」他極期待觀眾的反應：「認唔到唔知會咩反應？唔會郁我啩？」至十時許，安仔殺到將軍澳一個街市，貼地式向觀眾拉票，無非為向視帝寶座目標進發，於陣前瞓身拉票爭取民意！安仔初到街市旋即嚇窒街坊，但未幾即被認出及包圍影合照，安仔亦完全融入角色稱：「好耐冇食嘢！」結果一呼百應，燒臘檔檔主斬大舊叉燒請他食，又有老闆請食缽仔糕，最搞笑是海味檔檔主指安仔被困在越南良久，要請他吃海味補身！安仔在街市逗留短短十分鐘即被過百人捉實影相。

野人安殺入街市拉票受歡迎，瞬間被街坊包圍影相。	郭晉安	「野人」都有斯文一面，撇開啲鬚先吔叉燒！

嚇唔到細路

野人未玩夠轉戰的士站，有司機校低車窗與他握手，自稱無錢的安仔問可否載他一程？司機說：「當做善事囉！」安仔旋即上車並搞笑說：「車我去深圳呀！」未幾又去巴士站問排隊乘客可否讓他打尖，乘客見野人埋身即讓他插隊。安仔最後走到港鐵站口，引來一班市民圍觀，當中更與小朋友握手，安仔又逐一跟支持者合照，更有市民大叫一定看劇集撐場！

野人安搭霸王的士，司機大方話當做善事。

郭晉安吸引小朋友排隊握手，其實野人又有乜好怕喎！

文：影視組