陳奕迅身家多2億：咪又係着緊爛鞋!
陳奕迅完成過百場巡唱後，估計身家暴漲2億，不過他詐傻指不知自己如此有米，甚至以腳上爛鞋證明生活沒有大改變！談到他與老婆徐濠縈的造人大計，他即怕醜表示要睇心情：「製造呢啲唔講啦，得(o架)喇，有就有。」
歌神陳奕迅（Eason）歷時三年多的世界巡迴演唱會已於上月底完美落幕，估計他在這134場的演出中吸金逾2億港元，可謂大豐收！不過他日前在專訪中指從不在意進帳多少，更笑言依舊着爛鞋：「係咩？我有咁多錢咩？我冇特別注意，咪又係着緊啲爛鞋，因為呢樣嘢唔係令我最有滿足感，我唔係好理，都係咁過。」完成巡唱後，他終於能好好休息叉電，閒時去行山呼吸新鮮空氣，不過他之前行山不慎令腳部受傷，所以受訪當日要負傷上陣。
造人睇Mood
提到太太徐濠縈曾指想趕「尾班車」追多個小朋友，他笑言太太只有對外講，回家後未有告訴他，平日真性情的他更突然怕醜起來：「我Ready(o架)！但我唔係諗住造嗰個人，我係諗住做好我自己呢個人。嗰啲隨緣啦，我哋睇Mood，食番餐好嘅，製造吓氣氛，製造呢啲唔講啦，咁尷尬，得(o架)喇，有就有。」
雖然Eason之前忙於巡唱，但作為香港歌手的他未有忘記本地歌迷，早前推出全新廣東歌《四季》讓香港歌迷止渴：「香港歌迷未必鍾意我唱國語歌，雖然大家聽得明，但唔係最直接，要喺個腦度翻譯，而廣東歌就最直接。」
想唱韓文歌
不過他亦透露想嘗試唱韓文歌，認為音樂不應受語言限制，有時可「入鄉隨俗」，像韓星宋仲基、池石鎮到中、港、台時會選唱華語歌：「啲人話你香港人做乜出隻國語歌？咁已經有個隔膜，其實唔需要呢啲隔膜，唱歌之嘛，所以韓國人咪叻囉，佢嚟到唱韓文歌大家一樣咁冧，但佢會唱隻大家有共鳴嘅。」
髮型：Derek Li@Xenter
化妝：Karry Wong
場地：心燒食堂
文：音樂組
攝：劉斌