展鵬定欣帝后大熱排位超然
無綫為迎接明年50周年，昨晚在會展晒冷派出近200位當紅藝員出席節目巡禮，力谷新一年劇集及綜藝節目！今年視帝視后大熱陳展鵬及胡定欣的新劇孭重飛打頭陣出場。而來年孭劇最多的蕭正楠及王浩信則出盡力招呼廣告客戶，一於發功搵真銀！
無綫昨晚在會展舉行《在地同行 跳躍飛騰 TVB邁向50周年星光晚宴》，筵開逾90席招待逾千嘉賓及廣告客戶，派出近200位藝員出席及推介明年節目，出席藝人包括鄭裕玲、黎耀祥、陳展鵬、胡定欣、陳豪、郭晉安、田蕊妮、苗僑偉、黃宗澤、馬國明、歐陽震華、王祖藍、蕭正楠、黃翠如、岑麗香及王浩信等，星光熠熠！
名單中來年劇集共14套，藝員分組上台谷劇及播放宣傳片，打頭陣是今年視帝視后大熱陳展鵬及胡定欣主演的《同盟》，明顯備受器重！有份演出的鮑起靜將兩人的緋聞擺上台，叫大家留意兩人感情發展！片中定欣及展鵬打到七彩，展鵬更「Matrix」上身施展壁虎功，陳山聰則與姚子羚激咀！陳山聰在另一套《乘勝狙擊》中與傅嘉莉拍床戲，山聰輕吻女方粉頸，非常香艷！至於《迷》劇的田蕊妮及鄭嘉穎亦有咀戲。陳展鵬與胡定欣頻頻以「情侶檔」示人，問到新年及聖誕檔期會否加價？定欣笑說：「總之我哋好抵用，多啲搵我哋啦！」說到台慶頒獎禮快到，問會否互投對方一票？展鵬笑說：「唔使投佢都好大機會冧莊視后，但你就要投我一票，男仔競爭係好大，好多對手。」定欣識做指投展鵬一票。
蕭正楠被笑樣子老
《超時空男臣》代表蕭正楠（Edwin）及曹永廉上台大放笑彈，Edwin說：「TVB就邁向50周年，你就60，仲叫自己男神？」阿廉即反擊：「男神唔係計年齡，係講樣貌同氣質，你套劇入面做阿哥，你檢討吓啦！」至於《不懂撒嬌的女人》預告中，高海寧大晒事業線兼玩出水芙蓉，《老表，畢業喇！》的王祖藍模擬致電眾星邀約，郭晉安笑說：「我拎過視帝喇！我要拍啲冇獎嘅，呢套幫到我喎！」其他劇集有合拍劇《深宮計》、《溏心風暴3》、《使徒行者2》及《再創世紀》等。
Edwin、王浩信和田蕊妮是來年最多劇在身的小生花旦，各佔三劇，某程度反映受重視程度。Edwin及浩信滿場飛招呼廣告客戶，望獲得青睞做吸金王！Edwin接受電話訪問時說：「三套劇都同古裝有關，好期待之後嘅《深宮計》，其實《宮心計》我有份拍，當時飾演皇上，好快就死，梗係監製梅小青留意到我死得好，之後搵我合作好多。（現場有冇接近廣告客戶？）梗係有！我拋盡媚眼（口架）！佢哋可以搵阿廉拍抗衰老、腎虧廣告，我就拍名車、銀行同保險廣告！」
型男陳豪最吸客
浩信則說：「好開心以新面孔演出《溏心3》，我演李司棋同夏雨個仔，齊齊對抗米雪，好期待！（連拍咁多套劇，辛唔辛苦？）體力係有啲，但後生仔唔好怨，呢啲機會等咗十幾年，最大犧牲係冇時間陪屋企人。」有否趁機親近廣告客戶？他笑說：「有啦！希望賺多啲，我仲要養妻活兒。」而田蕊妮坦言很喜歡演戲，問到怕否別人眼紅，她謂:「唔會，多啲人眼紅，大家互相激勵係好事。」
大合照時間，黎耀祥、苗僑偉、歐陽震華、鄭裕玲及陳豪企前中，定欣及展鵬亦企在第一行顯眼位置。而廣告客戶趁中間空擋向眾星集郵，陳豪一如往年獲最多客戶排隊合照，岑麗香及張繼聰亦相當受歡迎。
文：影視組