莊思敏有錢冇父愛 糖妹撐起頭家窮開心

現實VS拍劇

莊思敏因為外形關係多演女強人、個性強悍的角色，例如在《潮流教主》飾演時尚雜誌的編輯，相反糖妹則是「細路女」，拍攝劇集《女人俱樂部》飾演葉蘊儀的年輕版，然而現實中，二人的個性又是否與螢幕形象一樣？

莊：喺《幕後玩家》第一次做師奶仔，都幾好玩，冇咩壓力又唔使顧儀態，出到嚟好多表情。其實今次角色真係同自己性格係完全唔同。

糖：你係一個好講義氣、溝通能力好嘅人，係一個易交心嘅朋友。

莊：你個樣好cute，但其實真係唔kai，係怕醜啲、內斂啲，劇入面嘅角色其實似你真實個性。

糖：係呀，以前就要成日chok cute樣出嚟，今次做女強人都係第一次，可能係監製見我有呢種特質，先搵我做呢個角色。

高挑VS細粒

莊思敏與糖妹，前者1米77，後者1米49，足足相差近30cm，二人身高上的差距，會否令她們看待事物有不一樣的觀點？生活模式與習慣又有何不同？

莊：我由讀書嗰陣已經比同學高，高嘅人望嘅嘢會遠啲，仲會見到人哋個地中海。

糖：我睇嘅嘢就近啲，會見到人哋個pat pat大啲。

莊：矮啲好o架，望落去都後生啲，又好似需要人保護咁，多啲人追。

糖：但係我dry咗好多年啦！不過矮就真係多啲人錫，但係家教就會嚴啲。以前同糖兄去做騷，我成日叫佢唔好幫我拎結他，結果有一次被人影到我拎住好多嘢，嗰個畫面原來真係幾「呢hea」o架。

莊：你咪好囉，有人幫你拎嘢，我呀，咩都要自己拎，啲人覺得我牛高馬大就好大力。

富貴VS平民

莊思敏甫出道就被揭爸爸是馬來西亞拿督，坐擁8億身家。相反糖妹家住深水埗，連「小康之家」也稱不上。前者有個富爸爸，後者則撐起頭家，二人對錢的定義有否因為家庭背景而有所不同？

莊：其實冇得介意人哋話我係富家女，家庭背景係冇得改變，但係我會比其他人付出更大努力。初初出道嗰陣，有啲人講到明唔會搵我做嘢，原因係「你都唔等錢使！」、「唔好call你做啦，個job咁少錢！」係連機會都唔畀我。我用好長時間去證明我係用心工作嘅人，依家啲人反而話「早知搵你做啦，你咁爛做！」

糖：唔止初出道，我依家都係住深水埗。都只係一個地區啫，我又唔介意人哋點講，同街坊熟買嘢仲平兩蚊添。雖然我屋企連小康都稱唔上，依家頭家都需要我撐，但係由細到大都覺得大咗就要養家，所以係理所當然嘅事。

莊：屋企有錢嘅代價就係家庭關係會疏離啲，因為爸爸要顧工作。我六年級嗰陣，同同學傾傾吓電話，佢話佢爸爸返到屋企要一齊食飯，我先知原來爸爸係會返屋企食飯。我哋幾姊妹幾多歲，爸爸都唔係咁清楚。仲試過爸爸接唔到細佬放學，先知道細佬已經由小學升咗中學。

糖：我哋家庭觀念會重啲，媽媽係家庭主婦，成家人晚晚都會一齊食飯。其實我冇諗過如果屋企有錢會點，因為錢對我嚟講唔係最重要，最重要係健康，我第一日入行就買齊全家保險，有咩事都有錢醫我就OK。

成熟VS可愛

高挑與成熟、的骰與可愛，似乎是一種連帶關係，高挑的女性只要一走出來就會散發成熟的味道，相反嬌小的女生就一定可愛、需要人幫助，二人是認同還是討厭？

莊：可能我係大女嘅關係，性格會硬淨啲，因為有一種要照顧細佬妹嘅責任。我初初做freelance model，接job開工我都係一手一腳搞哂，所以獨立啲。

糖：其實我只係外形好似好cute，但我有個細佬，同我差11年，好似多咗個仔咁，有一種要睇住佢嘅責任心，所以我個性係好獨立。

莊：依家成熟咗，反而唔係好頂得順啲扮可愛嘅女仔，可能男仔先受落。

後記：吃不到的葡萄是酸的？

莊思敏與糖妹是截然不同的兩個人，雖然口裏說沒有羨慕對方，但看得出莊思敏渴望擁有如糖妹與家人互相照顧的家庭溫暖。而糖妹未有羨慕對方有個富爸爸，但很欣賞莊思敏不怕捱苦、獨立的個性。

文：雲妮