成龍揚威奧斯卡 抗命謝老婆！

《奧斯卡州長頒獎禮》於香港時間昨日在加州荷里活的杜比宴會廳舉行，成龍與電影剪接師Anne V. Coates、導演Lynn Stalmaster及紀錄片導演Frederick Wiseman齊獲頒「終身成就獎」。大會安排湯漢斯（Tom Hanks）、成龍《火拼時速》（Rush Hour）舊拍檔基斯德加（Chris Tucker）及楊紫瓊（Michelle）先後上台介紹成龍，湯漢斯將成龍與畢士達基頓（Buster Keaton）及尊榮（John Wayne）等經典巨星比較，更食字以「Chantastic」（Fantastic）來大讚成龍。

講林鳳嬌英文名

基斯負責頒獎給成龍，兩人更即場攬攬，成龍興奮得親吻獎座，又自爆23年前到訪史泰龍寓所，首次接觸奧斯卡獎座情景：「我摸過、錫過仲嗅過（獎座），相信個獎仍然有我嘅手指模！」他坦言入行56年，拍逾200部電影，傷過咁多骨頭，終於夢想成真。

忙於為新片《機器之血》開工的成龍，完成頒獎禮後匆匆到機場乘私人飛機返內地，臨飛前接受本報獨家長途電話訪問，談到於頒獎台上的一番話，成龍說：「我有多謝太太同個仔，成家班、多謝香港呢個了不起城市，多謝中國令我更強壯，好驕傲成為中國人，多謝荷里活教咗我好多嘢，令我成名，亦多謝全世界粉絲支持我繼續拍好電影。」更指太太林鳳嬌非常高興，但事前曾要求不要在頒獎台說她的名字，不過鬼馬的成龍仍忍不住公開感謝家人：「我咪講阿嬌英文名『Joan』囉！哈哈！」

獨家放閃 成龍趕搭飛機返內地，臨行前仲拎住小金人影相留念。	史泰龍戥成龍開心，在台上更興奮到齊齊舉手。（法新社圖片）	李察基爾（左）與阿諾在紅地氈上握手。（法新社圖片）

緊張到唔知講乜

成龍坦言至今心情仍未平伏：「我係用平淡嘅心去面對呢個獎，但都唔知點解咁緊張，頭先聽Tom Hanks、Michelle同Chris介紹我，個心情唔識得點形容，係好開心，到之後自己出場講嘢，因為冇準備台詞，隨心而發去講，前半節都OK，講到一半個腦一片空白，好亂，唔知自己仲想講乜，好彩最後都叫做OK！」成龍又開心在席間與不少荷里活好友敍舊，還與導演畢特烈納傾談《火拼時速》系列第四輯的故事內容。

至於「小金人」將放哪裏珍藏？成龍笑說：「依家都諗緊，又想擺喺自己博物館，又想擺公司，一係就公司、屋企、博物館度度擺吓，一個地方一個月。（返香港再慶祝？）唔會啦！真係要趕住開工，之後一直忙，今晚就要飛走，冇時間留低同老友再傾耐啲！」

文：影視組