陳豪學做好老竇 退後搵平衡
四十有五的陳豪幸福到一個點，與陳茵媺婚後3年，已生夠3個組織幸福大家庭，有溫馨家庭作後盾，工作更有動力，近年更將咖啡變成事業。談到管教子女，他形容老婆陳茵媺才是專家，他要急起直追做個好爸爸，退後一步在兒女身旁循循善誘。
教細路？陳茵媺係專家！
陳豪與陳茵媺婚後3年抱3，大仔Aiden、二仔Nathan及細女Camilla組成幸福大家庭，3個子女中，陳豪覺得二仔Nathan最似他，頭髮同樣是啡色；大仔Aiden則與陳茵媺如同餅印，連胎痣也在相同位置！陳豪坦言3個寶貝已成為他的最大工作動力：「照顧小朋友唔容易，要好早起身，長時間陪住佢哋同教導，有咩做得好，有咩唔好，基本上由佢醒嗰一刻你已經要Ready畀佢哋，直到佢哋瞓晒覺，先有少少自己時間，不過我哋都要瞓，因為第二朝又要早起。工作以外，全部時間畀晒仔女，我一向都係幾家庭嘅人，唔做嘢會湊小朋友，好享受，見到佢哋開心，自己已經好心滿意足！」
助子女自由發展
陳豪與陳茵媺都不是「怪獸家長」，陳豪教導子女情願退後一步循循善誘，對他們也沒甚麼框架、期望：「做父母嘅責任就係要培育下一代，教好佢哋，令小朋友思想、態度正面。湊其實唔難，點樣教導就係藝術，坦白講我唔識，我太太先係專家，佢做好多調查、睇書，我都要急起直追去做一個好父親！教導方面，希望佢哋聽話，但又唔好太嚴厲，搵緊一個平衡點，仲不斷摸索緊。我係一個自由思想嘅人，小朋友嘅將來應該掌握喺佢哋自己手裏面，作為父母只係要培育好佢哋嘅基礎、人生觀、價值觀、待人處事，要教佢哋自律、自學、尊重人、尊重自己，退後一步去幫助佢哋自由發展。」
夫妻檔拍劇？咪搞！
陳豪與陳茵媺在教導子女方面相當合拍，但講到再合作拍劇，陳豪即耍手擰頭，更笑說：「你哋想睇咩？我就唔想，兩個已經係夫婦，再做銀幕情侶有咩好睇，觀眾會冇咗幻想空間，哈哈！」他與田蕊妮、胡定欣「鐵三角」合作的《鬼同你OT》取得成功，即再下一城開拍《來自喵喵星的妳》，以似曾相識的角色演繹新故事，可謂拍續集的新嘗試！陳豪說：「第二輯唔會有壓力，要將上輯感覺帶落嚟，監製已經做得好好，唔使我哋花心思。雖然拍緊新劇，但我哋嘅崗位似曾相識，會覺得有上集影子，但又有全新元素。今次嘅角色係用一種新手法演繹一個尖端科學家，當中涉及科學、天文、物理、方程式，要花多啲工夫去記對白。」
鍾意被摧毀
陳豪為角色電了一個爆笑愛因斯坦髮型，但他不介意「男神」形象被毀，反而嫌唔夠激：「冇乜所謂，我冇乜形象！我係追求突破嘅演員，愈將我毁滅愈好，完全認唔到我仲好，我鍾意屋o架！今次唔算最犀利，《天與地》仲突破啲！」他笑言髮型「幾特別」：「監製一開始話要將陳豪嘅有型摧毀、消滅，整咗個好似愛因斯坦嘅髮型畀我，其實我本來整咗個仲激嘅，但監製話太激，最後用番呢個髮型，我覺得Very Good，好科學家，大家可以專心睇我做戲。」
再戰大銀幕
由拍電影《晚九朝五》打入娛樂圈，及至拍劇令事業更上一層樓，拍了多年劇，陳豪會否又心思思重投大銀幕？他說：「電影有興趣，會視為挑戰，都會諗返去拍電影會係點呢？都有啲細Project嘅電影拍緊。突破就唔係我話事，好多角色已經做過，反而想做啲平實嘅角色，睇落簡單，實際唔簡單，想拍啲真實故事同人物，將佢哋嘅真實性格展現出嚟。我喺製作上有好多諗法、視野，觀眾應該睇多啲未睇過嘅嘢。」
咖啡王國？唔係想賺大錢！
圈中出名的「咖啡王子」陳豪，將興趣變成事業，創立自己的咖啡品牌，近年低調地發展咖啡生意。既要拍劇又要照顧子女，他惟有在深夜時分才到咖啡工場烘焙咖啡，但視為享受的他不覺得辛苦：「時間唔夠o架！要分配時間，咖啡生意依然好低調，穩步上揚，唔係想做到咩咖啡王國，希望建立到自己嘅網絡，唔係要賺大錢，只係想有一個選擇，畀人歎到一杯好咖啡。」
即使咖啡生意做出成績，陳豪也希望雙線發展，繼續做演員：「我始終係一個演員，自己鍾意做演員，一向做嘢都係興趣、夢想為先，好享受自己嘅工作！」
場地：Fovea
服裝：Harvey Nichols
髮型：Ben@M.i salon