Chilam呻貴 等買樓沮喪

型男張智霖（Chilam）與雨僑、焦媛、蔡一智及盧海鵬等前晚在將軍澳電視城為無綫節目 《我愛香港》錄影，眾人代表中區玩遊戲，Chilam說：「以前住過中區，但太塞車，所以已經搬走咗。」

租樓抵過買樓

問到樓市新辣招對他有沒有影響？Chilam說：「自己名下咁多年都冇樓，因為用公司買樓，所以冇影響。自己等咗好多年，等緊一個合理啲嘅樓價，但仲未遇到合適時機，好沮喪。」他表示買樓也會用作投資，亦有考慮買香港的物業作投資，但居住方面卻會選擇租樓，坦言租樓與樓價相比抵得多。而他在澳洲有物業，亦有考慮再在海外如新加坡等地置業，覺得有合理回報，樓價慢慢上升較健康，而香港樓價則冠絕全球。

雨僑透露由小學、中學及大學也在同一條街，人生行了不少斜路：「細個唔知羅便臣道樓價咁貴，仲話畀我都唔住，依家畀我梗係要啦！自己係長洲原居民，希望退休可以返長洲住，不過依家連東堤小築都要三百幾萬，樓價好貴。」焦媛則表示由於經常香港上海兩邊飛，她有意在上海買樓，但慨嘆內地樓價高。

趕住陪仔慶生

另外，昨日是Chilam兒子張慕童（魔童）的十歲生日，Chilam前晚出席蕭定一生日會後，即趕返家和兒子切生日蛋糕，上載兩父子溫馨合照及留言：「趕回家，雙位數生日快樂，Happy Birthday 10!!」昨日他又帶兒子打羽毛球作為慶生節目，玩直播拍下魔童打波情況，魔童當知道是直播即搶手機玩自拍，之後本來要拍下父親打波的情況，但又偷偷玩自拍，即被父親發現，同時「晒命」指自己的instagram戶口有超過三萬人關注！

文：影視組