甄子丹講外星話：學咗好耐先識！
「宇宙最強」甄子丹獲邀參加「星戰系列」電影演出，他指今次演出目的為家中兩位寶貝圓夢，認真廿四孝爸爸。提到戲中角色的「外星話」名字，他笑謂：「我都學咗好耐先識讀呀！」
子丹有份參演的荷里活電影《俠盜一號：星球大戰外傳》安排下月中正式公映，相關宣傳正式揭開序幕。昨早穿上型格皮褸的子丹會合由10人組成的白兵團，於灣仔五星酒店內會見來自東南亞的傳媒，吸引半百記者前來採訪。
汪詩詩狂影老公
子丹戲內造型的1比1人像首次曝光，穿上原版戲服及手持專屬武器，相當搶鏡。子丹太太汪詩詩亦有到場撐老公，更不時拿出手機影子丹，認真sweet爆。
事後子丹接受專訪，對於加盟「星戰」，他表示：「係呀，我答應接拍嘅時候姜文都未加入。（今次為咗仔女而接拍？）我問佢哋鍾意睇爸爸做星戰抑或葉問，佢哋揀前者，所以我更加希望拍好呢部戲。」
場面似《葉問》
子丹於戲中扮演盲眼武士「智刃嚴」（Chirrut Îmwe)，原來角色名字並非英語：「外星話，我都學咗好耐先識讀。（第一次演盲俠？）係，戴上特製鏡片拍打戲，明明睇到對方，都要扮見唔到，算係一次挑戰。（預告片見你一個打十個咁，葉問上身。）唔知電影公司係咪之前睇過《葉問》，加咗啲元素入去，我都覺得有啲場面相似嘅。」子丹透露有某些動作設計及鏡頭擺位，自己亦有給予意見。
文：影視組