國際影星成龍今日踏上奧斯卡頒獎台，接受由美國影藝學院主辦的《奧斯卡州長頒獎禮》頒發的終身成就獎，此乃第四位獲得此獎的亞洲人，亦是首位獲此榮譽的華人，認真威水。他昨日已飛抵洛杉磯作準備，接受本報長途電話訪問時更直認心跳加速。
現年62歲的成龍，早前以收入6,100萬美元（約4.7億港元）成為美國權威財經雜誌《福布斯》（Forbes）公布全球十大最高收入男星榜第二位，身家數十億。成龍6歲加入影壇，至今56年，作品超過200部，其中《火拼時速》系列的三部作品於北美累積票房超過5億美元、全球累積8.35億美元。
見慣大場面的成龍笑說：「依家全世界都關注令我緊張，加上好多朋友打嚟恭喜我，佢哋仲開心過我，搞到我再緊張啲添！」雖然獲這項殊榮，但成龍未有帶同太太林鳳嬌及兒子房祖名同行，僅帶工作夥伴，貫徹他以事業為首的宗旨。身為中國人，成龍透露必以唐裝上陣，並已帶了三套不同款式作選擇，但由於大會指定出席男士必須配以黑色煲呔，令穿唐裝服的他有點頭痕。致詞方面，向來不精於說話的他笑指單是度稿已度了成個月：「到時會講英文，雖然度咗講咩，但真係太正經，所以可能會睇到時諗到乜就講乜。（驚唔驚講錯嘢？）唔理啦！隨心，我依家個腦好亂，又驚多謝一個唔記得多謝第二個。（大會有冇限定講幾耐？）冇，但都要識趣，唔通講到等人圈咁醜怪咩！」
成龍指頒獎禮上獲曾合作及將會合作的荷里活公司老闆買枱支持，亦有不少重量級明星好友支持，但他大賣關子，笑言大家(目及)實電視直播便知曉。而頒獎禮過後，成龍要匆匆趕返內地拍新片《機器之血》，對於《機》片拍檔、台灣男星羅志祥要求他於頒獎台上高呼「羅志祥，我愛你！」成龍笑指若然真的這樣做，相信很多人不放過他！