陳嘉桓姐手姐腳湊細佬跪低
「打女」陳嘉桓（Rose）日前不用開工，即轉mode享受家庭樂，由拍戲飾演警花，變番現實的好家姐，帶着勁似「天線得得B」的細佬Johnson去玩具店。Johnson一入玩具店猶如甩繩馬騮，完全不受控四圍走，陳嘉桓又抱又踎，全程貼身照顧，連最愛的芭比公仔也不能多看，全程雞手鴨腳，畀「得得B」細佬玩到「跪低」！
Rose近期忙於拍攝新戲，在戲中飾演火爆師姐，日前Rose不用拍戲，便抽空與母親、14個月大的弟弟Johnson去尖沙咀逛街。當日所見，Rose不用開工只化了淡妝，而她的幼弟Johnson尖面大眼，極似「天線得得B」，相當可愛。Johnson深得家姐疼錫，獲全程貼身照顧，她們一行三人，先到玩具店閒逛，Johnson一入到玩具店即興奮到周圍走，Rose跟着弟弟東奔西跑，又跪又抱，全程被牽着走，就連她自己最愛的芭比公仔也不敢望多眼，一切以弟弟行先，果然是一位好家姐。
乘機鍛煉肌肉
事後記者致電Rose，問她是否放假攰過拍戲？Rose笑言：「係呀，每次湊佢都好似做劇烈運動咁，起身踎低，可以收到大腿肌肉！」問她湊細佬有甚麼趣事？Rose謂：「有時同細佬去街，啲街坊會誤會我係細佬個媽咪，可能覺得我哋有啲似樣，好搞笑。」
明天是Rose 24歲生日，她直言沒有特別節目，都是跟家人一起過，問她今年生日會否許願找個男朋友？她笑言：「呢啲順其自然，今年就簡簡單單咁過，同屋企人一齊，都好開心。」
文：影視組