200歌迷BBQ慶生 梁漢文拖老婆東京Keep住浪漫
歌手梁漢文在歌迷慶生聚會上，被逾百女Fans重重包圍，他親民地逐個Fans攬實自拍外，更陪玩足三粒鐘，不過在其心目中仍然是老婆最大，專程帶愛妻飛東京過二人世界度生日，更骨痹地說：「生日願望係同太太Keep住甜蜜。」
上周六是梁漢文（Edmond）45歲牛一，日前其歌迷會特為偶像舉行BBQ生日聚會，會上近二百歌迷送上壽包、鋼琴型蛋糕及乳豬賀禮，預祝Edmond「三三不盡，六六無窮」取其「福澤綿長」之意。為報答歌迷們的美意，Edmond大打親民牌，除主動走近歌迷撩傾偈外，又不厭其煩逐個歌迷攬住影即影即有自拍照，足足影了近二百張相，之後又和歌迷玩遊戲及簽名，當然少不了獻唱娛賓，見Edmond唱到踎地，投入之情十足開迷你演唱會。
海邊浪漫拍拖
而正日生日，Edmond就撇低許志安、蘇永康等好兄弟，獨留給結婚八年的太太林文慧，正身在東京的他在長途電話中說：「同老婆去咗東京玩幾日慶祝生日，依家喺海邊（拍緊拖）。」問太太送了甚麼生日禮物？他表示太太未買到，不過兩公婆開心最緊要，更發表愛的宣言：「最緊要兩個人開開心心，Keep住甜蜜嘅感覺。（生日願望呢？）身體健康、事事順利。（想有BB做賀禮？）冇諗，呢啲順其自然啦。」
談及和歌迷舉行生日聚會，他謂其實每年都會搞一次Fans Party，不過今年提早舉行是想跟歌迷預祝生日，Edmond感謝歌迷的支持，打算明年舉行既特別又可以和歌迷親近的演唱會，但詳情要他回港後才落實。
文：音樂組