雲頂奇遇記 祖兒遇分身阿姐 克勤抽錯水

天后容祖兒與李克勤日前到馬來西亞雲頂舉行兩場巡迴演唱會，還分別有「奇遇」，笑言對雲頂留下深刻印象。祖兒自爆離奇遇上「分身酒店女職員」，她表示帶去的電腦上網有問題，遂聯絡酒店尋求幫忙，酒店表示安排一位電腦部專業人員查看，該女職員非常細心地查看其電腦，但祖兒笑說：「佢講咗一大堆聽唔明嘅英文，當中只係聽到Google呢個字，搞咗15分鐘佢再講咗啲我聽唔明嘅說話就走咗，但15分鐘後，就好神奇咁上得番網。」

放濕機變抽濕機

當晚祖兒到訪克勤房間一齊食晚餐，但她說：「晚餐送入嚟時，我嚇咗嚇，因為送餐嗰個係嗰位電腦部專業女士。一日之後，做完第一場騷，夜晚大家開會叫咖啡，又係同一位電腦部女士送咖啡嚟！」祖兒即追問身邊人究竟是否自己眼花，還搞笑地指好像過了晚上8時，全酒店就只得那位電腦部女士工作般：「十項全能咁！你叫咩都係佢搞，好好笑！」

克勤與祖兒到馬來西亞開騷，獲好友兼羽毛球王李宗偉（中）捧場。

放大圖片

至於克勤笑言沒想到雲頂11月的溫度跟英國一樣冷，向來怕凍的他向酒店拿了兩個暖風機作暖身之用，但開了一晚後令喉嚨很乾，他即轉問酒店取放濕機：「酒店好好，搬咗一個巨大嘅機器入我房，綵排完之後，就用自己九牛二虎之力將個機器推咗入睡房，好安心咁等佢噴水氣出嚟，但等咗個幾兩個鐘都冇動靜，我再去研究部機，睇係咪自己按錯掣，先發現酒店畀咗部抽濕機我，嗰一刻真係好暈，哈哈！」

「球王」李宗偉捧場

另外，演唱會獲馬來西亞羽毛球王李宗偉捧場，克勤透露跟對方早已相識，李宗偉更與祖兒合作過拍攝內地綜藝節目，之前他來港，大家也有相約晚飯，稍後李宗偉會來港參加羽毛球公開賽，屆時亦將再相約晚飯兼打波。而祖兒與克勤的世界巡迴演唱會已進行了一年，合共唱了29場，稍後計劃到上海、澳洲、歐洲等地開騷。

文：音樂組