鍾嘉欣返港搵快錢 一粒鐘袋20萬
闊別香港10個月的藝人鍾嘉欣，昨晨於產後首度由溫哥華返港，出席今晚舉行的品牌活動，短短宣傳一粒鐘便穩袋20萬港元，難怪她願意撇下老公及囡囡，極速來港走一轉！
今年2月與拍拖10個月的脊醫Jeremy Leung在溫哥華奉子成婚的鍾嘉欣，8月誕下女兒Kelly成為人妻兼人母後依然有價有巿，昨日她特地由加拿大返港，出席今晚在中環舉行的品牌活動。
據知是次活動的酬勞高達20萬港元，由嘉欣昨晨6時半抵港至明日凌晨1時離港計，此行共逗留43小時，當中只花1小時便完成活動，絕對是旋風式襲港搵真銀！對向來精打細算的嘉欣而言，賺「快錢」之餘，又可順道返港探望親朋，效益甚高，難怪她願意撇下只得兩個多月大的囡囡Kelly及老公Jeremy，隻身返港掘金！
湊女有滿足感
逾半百記者昨晨在機場守候嘉欣，由於坐長途機，她戴着黑超仍難掩倦容，左手無名指則戴着婚戒。可能因產後未收身，她穿着長長大褸包到冚，但面對大批記者亦合作受訪，她說：「今次返嚟好短時間就走，辛苦傳媒、經理人嚟接機，咁耐冇見都掛住大家，好開心見到大家！」問到收身成績，她說：「爭少少，冇特別收！（湊囡囡辛苦嗎？）辛苦，但有滿足感！（有冇蝦碌嘢？）暫時冇。（囡囡似邊個？）兩個都似。」
未約姊妹見面
問到何時與老公及囡囡一家三口返港，她說：「有機會，將來，今次太趕！（有傳你12月拍劇？）聽日再講。（今日有咩做？）休息啦！（見吓姊妹？）有時間會見！」離開機場後，嘉欣在經理人陪同下返回新都城寓所，她表示暫不會外出，亦未知一班好姊妹會否前來探望。
對於嘉欣未收身，其好姊妹之一王君馨說：「最緊要健康！」而岑麗香則在電話中說：「我今日有工作，暫未有時間過去見佢，睇吓係咪可以安排時間見面。（教佢減肥？）我都未見到佢，可能好索呢！收身唔急啦！慢慢做運動，自然收身最好。」
文：影視組