何猷君認愛少女標本袁紫僑

何猷君與樂壇少女組合少女標本的成員袁紫僑（CoCo）在萬聖節前夕，化身成情侶小丑狂歡，兩人的緋聞火速炒熱，CoCo先死口唔認拍拖，但隨着兩人被目睹當街十指緊扣，又被爆親熱錫錫，CoCo終大方承認與猷君發展中：「係啱啱開始。」臨離開香港前的猷君，則風騷地在電話中笑說：「佢都講到好明顯啦！我都冇乜好否認啦！」

推車仔晒恩愛

其實打得火熱的猷君與CoCo在社交網早已洩蜜，兩星期前他們去上海旅遊，更到主題樂園拍拖勝地留下足迹，猷君當時上載一對卡通公仔相，留言「us」，可見已愛得癡纏，又不避嫌上載與友人的合照，CoCo更坐上行李車由猷君推住行，開心share拍拖的甜蜜時刻。

袁紫僑坐上行李車，由「柴可夫」何猷君負責推。	袁紫僑有氣球又有花收，冧晒！	猷君上載心心眼的卡通公仔傳情。

昨日CoCo被問到與猷君撻着一事，她在電話中先支吾以對，又多次靜默不懂回答，談到被目睹拖手仔，CoCo忍不住大笑說：「點答你好呢，呢個問題。」後來亦親口承認與猷君發展中，但希望低調處理戀情，兩人經朋友介紹認識兩、三年，雖然猷君「富二代」身份比較特別，但CoCo未感壓力：「只係唔需要特登去講，我鍾意佢係因為佢份人好。」她指兩人是自然發展，戀情才剛開始，未見家長，也沒太快想結婚問題，但她強調大家是認真對待這段感情。

舊愛誠心祝福

至於猷君媽咪「四太」梁安琪，表示未見過CoCo：「唔知邊個，拍拖要有，要拍吓拖，但依家係創業時候。」而CoCo舊愛周志文則送上祝福：「拍拖好開心，佢搵到一個好對象。（會否有酸溜溜嘅感覺？）件事過咗咁耐，都唔會酸，誠心祝福佢！（打畀CoCo講恭喜？）拍拖好平常，唔會特登去恭喜，喺呢度（透過傳媒）恭喜都一樣。」

文：音樂組