Katy慶生箝爆男友 周董昆凌扮學生
影星任達華與奧蘭度布林（Orlando Bloom）因合作拍戲而成好友。近日電影煞科，任達華設宴「歡送」好友，奧蘭度對「上海名物」大閘蟹及小籠包一試難忘，食到舉起拇指。已返回美國的奧蘭度更邀請拍檔昆凌夫婦參加女友Katy Perry的生日派對，席間眾人扮嘢玩到癲﹗
奧蘭度早前飛往上海，會合任達華及昆凌等演出電影《極智追擊﹕龍鳳劫》，經過50日拍攝期電影近日終於煞科，任達華即訂了兩圍上海菜，設宴款待奧蘭度。談到這頓「餞別宴」，任達華表示：「估唔到外國人咁鍾意食上海菜，當晚仲『加料』叫咗20隻大閘蟹。其實我同奧蘭度都唔係咁識拆大閘蟹，我惟有叫佢剪開嚟食囉，點知佢一試難忘，仲扁嘴問我佢返咗美國之後點算好。」由於奧蘭度日內會出發到英國倫敦開會，於當地開設中菜館的任達華即寫下地址，着對方前往食飯：「我同佢講嗰度冇大閘蟹，但胡椒咖喱蟹好出名，希望幫到佢啦。」
激咀放閃
因為拍戲關係，奧蘭度日前錯過了女友Katy Perry的32歲生日，故完成電影拍攝工作後，他即飛返洛杉磯，為對方補祝生日兼慶祝萬聖節。派對以50年代校園Look作主題，Katy以一身索爆校長打扮現身，奧蘭度則扮成運動健將配合，Katy更搞笑「教訓」百厭撩女的奧蘭度，二人又公然於台上咀嘴，又攬又錫合照，認真hot爆！同場除有人氣模特兒Cara Delevingne及Suki Waterhouse外，昆凌及丈夫周杰倫亦是座上客，二人也甜蜜放閃。因工作無暇參加派對的任達華表示：「昆凌夫婦咁啱有工作要飛美國，咪順便出席埋派對囉，佢哋都有叫我，但嚟緊我要同太太飛去夏威夷出席影展嘛，遲啲相信會有機會再聚嘅。」他又大讚奧蘭度單純、有禮及冇巨星架子，彼此合作相當愉快。
文﹕影視組、外娛組