Kim Robinson數巨星舊事 為阿梅面紅
明星御用髮型師Kim Robinson，經他手的粒粒巨星，他笑言重提昔日梅艷芳在紅館笑罵他遲到一事依然會面紅。已入行40年的他認為世上沒有不美的女人，只有錯配髮型而變醜的女人，直斥坊間太多Cheap髮型店及Cheap髮型師！
現年59歲、來自澳洲的Kim Robinson，扎根香港髮型界40多年，堪稱髮型界大哥大，手上的名人客戶包括林青霞、劉嘉玲、張曼玉、鞏俐、關之琳、林憶蓮、葉蒨文、已故的梅艷芳、張國榮和陳百強等。他與眾星有多年感情，既是客人亦是朋友：「青青（青霞）啱啱先嚟整頭髮，佢嘅短髮好清新，易打理。我幫佢做咗30年頭髮，女人都一樣，個個都想變，之前佢都試過Bob頭，又試過留蔭，冬天會改變一下。」又透露劉嘉玲近日亦試剪Bob頭。
葉蒨文「百無」照Set頭
Kim多年來與圈中人合作無間，經歷不少驚險事。他指當年阿梅在紅館開演唱會，負責髮型的他卻遲大到，在開騷前一刻、晚上７時45分才趕抵現場，阿梅知道他是為英國戴安娜王妃做髮型而遲到，所以沒有怪責他，卻以此事開玩笑作為演唱會的開場白，Kim說：「阿梅當住現場兩萬個歌迷面，話『呢個鬼佬呀，遲到呀！去做Diana頭髮，今日我先係Queen，下次要叫佢等！」另一次驚險事則是葉蒨文（Sally）開騷，他說：「我同Sally出去做騷，佢個助手畀人偷咗個袋，風筒、梳、Gel都冇晒，得幾個髮夾，我好驚，淨係用手幫佢梳髻，佢完全唔知件事，仲好滿意！」不過要數十級驚險一次，莫過於EYT年代做現場直播，Kim一人負責汪明荃、鄭裕玲、狄波拉和鍾鎮濤等12位藝人的髮型，每人只有半小時！
投資2,000萬開店
他認為髮型有助提升自信，女生不夠美並非出於體形問題，而是選擇了不合適的髮型。去年，他投資2,000萬元在西營盤和銅鑼灣開設兩間時尚革命理髮店「kr+」，主攻年輕人市場，要找Kim理髮使費動輒過萬，而店舖交由其徒弟主理，最低收費只需數百元。兩名得意弟子Tan和Eric已分別跟隨了他17年及６年，Kim直呼他們做「My son」，關係如至親。Kim強調理髮店價錢相宜但質素高，並直斥同行只懂鬥便宜，語帶不屑：「出面好多Cheap salon，價錢Cheap、服務Cheap！」
文：Tracy Leung
攝：吳文聰