森美自拍Batman抱抱 天明夫婦8字摩天輪咀住見證

澳門新濠影滙昨日開幕一周年，昨日舉行「最長自拍接力人龍」挑戰健力士世界紀錄活動，為連串一周年慶祝活動展開序幕！最終新濠影滙成功以888張接力自拍，成功打破今年於珠海錄得的586張紀錄，刷新健力士世界紀錄，合力共創歷史一刻！

「新羅賓」恨睇Batman騷

擔任司儀的森美和顏子菲先在記者會中，與蝙蝠俠、翠兒、賓利兔及星級名廚、魔幻間魔術師法蘭茲‧哈拉瑞一齊自拍，為創紀錄的數百名員工打氣。健力士世界紀錄認證官Joanne Brent亦在場畀貼士，叫大家最緊要放鬆一點。儀式完畢後，大隊移師新濠影滙正門，在8字摩天輪前開始挑戰世界紀錄。世界紀錄認證官Joanne在旁逐張相睇，如發現不合標準便會要求限時再拍，開頭有些參加者不太熟操作，需在短時間內重拍，氣氛緊張！

一大群參加者排隊自拍，挑戰世界紀錄。	洪天明與周家蔚在金光璀璨的8字摩天輪前留影兼咀嘴。	洪天明、周家蔚

雖然森美未有落場，但打氣的他都睇到握緊拳頭勁肉緊，在挑戰開始前，他搶先與蝙蝠俠自拍，期間更獲對方兩度抱起，事後他在社交網激動寫道：「感覺我就是新羅賓！」訪問時森美大讚活動氣氛高漲，又笑稱難得可以小鳥依人：「我抱起女仔就多，我講緊我個女呀，掉番轉頭畀男人抱住就第一次，幾有安全感o架！」對於新濠影滙，曾與家人到此一遊的森美讚不絕口：「最深刻印象係坐咗個8字摩天輪，因為呢個係世界上唯一一個8字形摩天輪，玩得好開心，希望下次嚟試多啲唔同嘢，我鍾意Batman，想下次可以睇『蝙蝠俠夜神飛馳』，我都鍾意睇Magic，想睇埋『魔幻間』嗰個魔術表演。」

帶囝囝觀賞魔術表演

至於洪天明和周家蔚夫婦昨日亦現身新濠影滙，由於他們有份投資的美容品牌將於新濠影滙搞活動，所以今次來澳門是「一半做嘢，一半遊玩」。期間他們登上名為「影滙之星」的8字摩天輪，從高處觀賞醉人景色之餘，同時見證眾人挑戰世界紀錄，周家蔚明顯睇到雙眼發光：「如果可以喺度燭光晚餐就好喇！」當她見到老公分神撳手機，她便嬲嬲豬詐型，但洪天明見狀都有錫面珠和咀嘴補數。提到新濠影滙中「蝙蝠俠夜神飛馳」4D騷和「魔幻間」魔術表演，他們在訪問中表示曾帶囝囝TJ觀賞，又指不少設施很適合一家大細來玩，所以他們喜歡約埋錢嘉樂夫婦、文頌嫻夫婦一同前來，讓小朋友有個伴。是否想參與挑戰世界紀錄？他們就擔心失手會連累大家由頭拍過，所以最後打消念頭。

文：影視組