荷里活紅星吸金力強，但使錢能力仲勁！很多巨星為了提升生活質素，一擲千金買超級遊艇同私人飛機亦唔手軟！美國樂壇巨星夫婦Jay Z與Beyonce就是行內數一數二的「大豪客」（Big Spenders）！
最近獲選為《福布斯》（Forbes）2016年全球最高收入名人夫婦的Jay Z與Beyonce過去一年合共勁賺1.07億美元收入，保守估計佢兩公婆的身家高達10億美元（約78億港元）！兩公婆賺錢勁，使錢亦唔嘢少，衣食住行樣樣都要豪！二人經常互送「厚禮」，幾年前Beyonce為慶祝Jay Z做老竇後的首個父親節，豪花4,000萬美元（約3.1億港元）買私人飛機Bombardier Challenger 850給愛郎。飛機設備齊全有客廳、睡房及廚房，更有又大又靚皮梳化招呼朋友，可容納15至19位乘客。兩公婆與女兒Blue Ivy就經常乘坐呢份「禮物」四圍飛。Beyonce愛在私人飛機上chok甫放上網炫富一番。
Jay Z兩年前亦「回禮」，花7,000萬美元（約5.5億港元）買下超級豪華遊艇Galactica Star，送給老婆作32歲生日禮物，最近兩人經常被影到坐遊艇四出度假。該遊艇全長213呎，是全球最大型遊艇，設備完善，有睡房連私人露台，上層設有貴賓房，亦有泳池、桑拿及按摩池。據知原本遊艇艇主是尼日利亞能源大亨Kola Aluko，後來賣給Jay Z。
Beyonce在美容打扮亦「重槌出擊」！擁有一雙美腿的她最愛穿leggings來騷長腿，2007年她試過為了配合BET音樂頒獎禮的5分鐘演出，花10萬美元（約78萬港元）買下國際品牌Balenciaga出品的名貴「黃金leggings」，而她只穿着過兩次就沒有再穿，即是穿一次就要5萬多美元（約39萬港元），認真大嘥！
Jay Z與Beyonce亦好肯花錢在千金Blue Ivy身上，早前Beyonce首次帶囡囡出席大型場合MTV音樂錄影帶頒獎禮，由於是囡囡「第一次」，當然要打扮到靚一靚。兩母女以王后公主打扮示人，據知Blue Ivy穿的裙子由名師Mischka Aoki設計，價值1萬3千美元（約10萬港元），真係唔係個個細路女都着得起！
文：外娛組