展鵬想玩裸體笨豬跳
憑劇集《城寨英雄》成為新加坡視帝的陳展鵬昨日到屯門出席活動，大談遊澳門經歷，並驚爆打算將來裸體笨豬跳，劉佩玥及司儀陸浩明笑指想睇「大鵬展翅」！活動後，展鵬說：「睇過啲外國訓練model會咁樣跳降傘。（同邊個跳？揀個『定』啲嘅？）定啲？消防員囉！」問展鵬有否試過裸泳或裸跑？他笑言會在浴室「裸泳」。
問贏得新加坡視帝後會否更有信心贏埋台慶頒獎禮的獎項？他說：「每年都大信心，希望每套劇都有好回報。（想同緋聞女友胡定欣贏帝后？）想一齊攞，佢唔攞我都想攞。」講到有份客串的劇集《巨輪ll》結局收視破紀錄，他表示很開心。會否拍第三集？他說：「都想，但靈魂人物始終係細佬蕭正楠，我嘅拍檔鍾嘉欣都結婚生BB，如果有好題材，我都想返嚟。（《巨》劇破咗《城》收視紀錄，有冇唔開心？）冇，證明我好腳頭囉！」