劉佩玥騎黃宗澤 激咀任摸Pat
港姐劉佩玥及黃宗澤於前晚首播的無綫新劇中激咀7秒，二人在預告片段中的火辣摸Pat床戲更成為焦點！對此劉佩玥自認幸運能遇上對手黃宗澤，扮演情婦的她直言無意挑戰憑演「小三」上位的李佳芯。
前港姐劉佩玥（Moon）及黃宗澤（Bosco）於前晚首播的無綫劇《幕後玩家》中上演激咀戲，並肉緊咀足7秒！好戲在後頭，二人在預告中的床戲更加火辣！只見劇中有家室兼有女兒的Bosco在車上打電話唱歌哄女兒睡覺後，即由「慈父」變「玩家」直接搵情婦劉佩玥。Moon僅以單薄睡衣應門，大晒事業線的她一見Bosco即撲前獻吻激咀，咀到面都凹埋。二人在預告中床上纏綿，Moon騎坐Bosco身上，Bosco則擁抱時雙手放在Moon的Pat Pat上，畫面香艷！
緊張胃痛
Moon接受本報訪問，自認幸運遇上Bosco，拍攝時零尷尬：「拍親熱戲對我係好困難嘅事，拍攝前我緊張到胃痛，但好幸運有Bosco呢個好對手，同我講好晒隻手擺喺邊，令我心理上舒服。」談到首集即晒線，她笑言冇加工僭建：「我冇特登做啲咩，因為件戲服好薄。」是否想挑戰扮演「小三」扮到上晒位的李佳芯？她說：「冇人會代替到其他演員，我唔擔心被標籤成『小三』。（介意被定型？）唔係，只係我希望形象上百變。」
疑似爆粗
昨日Moon在屯門出席活動，提到首集播出即被call爆機，她說：「嗰幕播完，whatsapp爆咗！呢啲戲顛覆我畀人嘅感覺，角色同我零相似，現實入面我唔會做小三，冇興趣。但我有睇參考資料，希望觀眾接受角色。」她稱未知緋聞男友伍允龍有否欣賞其激情戲：「我連父母都唔係好敢講，但佢哋話唔緊要啦，做戲啫！」另外，《幕》劇播出第一集即掀網上熱話，最吸睛除了劉佩玥吊帶低胸裙及孫慧雪的三吋事業線外，更有指Bosco疑似爆粗！有網民指Bosco劇中好似講咗句：「呢個真係戇X鋒鋒呀。」但聽真，其實Bosco是講：「惡搞鋒鋒。」而《幕》劇首集收視最高26.8點，成績不俗。
文：影視組