老公Rap歌送驚喜爆郭穎兒躁底

藝人郭穎兒（Celia K.）前晚與圈外男友李冠峰在金鐘舉行婚宴，筵開三十席。席上，一對新人致詞時真情流露，感觸得台上雙雙落淚。期間，新郎哥李冠峰與當晚司儀、組合C AllStar成員釗峰合唱一首歌曲《天梯》給新娘子，新郎哥更邊唱邊攬實Celia K.，場面溫馨！除了唱歌外，李冠峰還即場Rap歌冧太太，當中歌詞包括「老婆你淡定，以後洗衫煮飯等我嚟！餵狗執屎等我嚟！唔識佢嘅人以為佢躁底，但我就覺得佢係大方得體！」歌詞甚心思。李冠峰坦言太太事前表明不准他表演英文與韓文歌，故與釗峰要秘密炮製驚喜。